Душанбе. 7-уми январ. ОИ «Азия-Плюс» – Соли равон Лоиҳаи таҷдиди соҳаи маориф ният дорад, дар Тоҷикистон беш аз 1 млн. нусха китобҳои дарсӣ барои синфҳои ибтидоӣ нашр намояд.

Тавре аз Маркази идораи лоиҳаҳои соҳаи маориф ба ОИ «Азия-Плюс» хабар доданд, 8 номгӯи китоби дарсӣ, ки барои синфҳои 1-4 пешбинӣ шудаанд, аз рӯи барномаҳои навтарини таълимӣ тартиб дода шуда, ҷавобгӯи меъёрҳои байнулмилалианд.

Ёдрас мекунем, ки Лоиҳаи таҷдиди соҳаи маориф аз ҷониби Бонки ҷаҳонӣ ва Ҳукумати Тоҷикистон дар ҳаҷми 24 млн. $ маблағгузорӣ шуда, ба рушду бозсозии низоми маориф дар Тоҷикистон равона гардидааст. Татбиқи амалии нишондиҳандаҳои лоиҳа 31-уми июли соли 2010 ба итмом мерасад.

Реклама на asia+

           

Душанбе. 7-уми январ. ОИ «Азия-Плюс» – Имрӯз ҷаласаи ҳайати мушовараи Вазорати маорифи Тоҷикистон баргузор мешавад, ки дар он аз фаъолият дар соли сипаригашта натиҷагирӣ карда шуда, вазифаҳо барои соли ҷорӣ муайян карда хоҳанд шуд.

           

Тавре котиби матбуотии вазорат Ноилшо Нуралиев ба ОИ «Азия-Плюс» хабар дод, дар кори ҷаласаи ҳайати мушовара беш аз 300 корманди соҳаи маорифи кишвар, аз ҷумла роҳбарони шӯъбаву раёсатҳо ва сарварони чанде аз муассисаҳои таълимӣ аз тамоми манотиқи ҷумҳурӣ ширкат хоҳанд варзид.

           

Ба иттилои манбаъ, қабл аз оғози ҷаласа дар бинои вазорати маориф намоишгоҳи дастовардҳои муассисаҳои маориф дар соли 2008 доир мегардад.

           

Ёдрас мекунем, ки ҳукумати ҷумҳурӣ буҷаи соҳаи маорифи кишварро барои соли 2009 дар ҳаҷми 1 млрд. 139 млн. 446 ҳазор сомонӣ тасдиқ кард, ки он нисбат ба нишондиҳандаи соли пешин қариб ду баробар зиёдтар аст.

Реклама на asia+

Душанбе. 6-уми январ. ОИ «Азия-Плюс» – Биржаи меҳнати ҷавонони нази Кумитаи ҷавонон, варзиш ва сайёҳии ҷумҳурӣ бо ширкатҳои русиягӣ доир ба таъмини 400 нафар коргарони мавсимӣ бо ҷойи кор дар Русия қарордод баст.

Тавре муовини директори муҳоҷирати хориҷии биржаи мазкур Абдурозиқ Кабудов ба ОИ «Азия-Плюс» хабар дод, мувофиқи қарордод, 250 нафар ба кори мавсимӣ ба совхози Каповкаи вилояти Волгоград сафарбар хоҳанд шуд, ки музди меҳнаташон 450-600 $ аст. Боз 150 нафари боқимонда дар ширкати агрохолдингии «Бунятина»-и шаҳри Дмитриево машғули кори мавсимӣ гардида, ба ҳисоби миёна аз 500 то 700 $ маош хоҳанд гирифт.

А.Кабудов зикр кард, ки кор асосан ба таври қонунӣ ба шахсони аз 25 то 40-сола пешниҳод гардида, пардохти роҳкиро аз ҷониби ширкати корфармои русиягӣ амалӣ мешавад ва коргарон бо хобгоҳи дорои тамоми шароит таъмин хоҳанд шуд.

Реклама на asia+

 



           

Душанбе. 7-уми январ. ОИ «Азия-Плюс» – Тибқи пешгӯии Агентии обуҳавошиносии Тоҷикистон, зимистони имсола сербарф меояд, вале начандон сард хоҳад шуд.

           

Тавре муовини директори агентӣ Маҳмад Сафаров ба ОИ «Азия-Плюс» хабар дод, барои аввалин бор дар таърихи агентии обуҳавосанҷии кишвар пешгӯии мавсимӣ ба зимистони имсола омода гардида, он ба ҳукумати ҷумҳурӣ пешниҳод гардид.

 


 


 


        

Ба қавли ӯ, мувофиқи пешгӯии мавсимии омодашуда, зимистони имсола чун зимистони соли гузашта сард нахоҳад буд, баръакс, ҳарорат 1-2 дараҷа гармтар аз ҳарорати зимистони маъмулӣ дар Тоҷикистон мешавад. «Ҳарорати пасттарин то 12 дараҷа сардӣ шуда метавонад, вале бориши зиёд дар назар дошта шуда, барфи навбатӣ рӯзҳои 10-11-уми январ пешбинӣ мешавад», – гуфт ӯ.

           

Номбурда зикр кард, ки дар омодасозии пешгӯии мавсимӣ ба онҳо мутахассисони маркази гидрометереологии Русия кӯмак кардаанд. Қобили зикр аст, ки маркази мазкур бо суперкомпютер муҷаҳҳаз буда, қодир аст дар як сония то миллиард амалиёт анҷом диҳад. «Пешгӯии мавсимии омоданамудаи мо иқдоми нахустин буда, он машваративу омӯзишӣ аст ва 7 рӯзи аввали пешгӯӣ то ба 95-99 дарсад мувофиқу дуруст меоянд, вале пешгӯии минбаъда мумкин аст ба 50-60 дарсад мувофиқ ояд», – изҳор дошт М.Сафаров.

           

Муовини директори агентӣ ҳамчунин зикр кард, ки мутахассисони тоҷик дар маркази «Росгидромет»-и Русия таҷриба омӯхтанд ва кунун таҷрибаи андӯхтаро дар Тоҷикистон истифода мебаранд. «Агентӣ ният дорад, ахири моҳи феврал пешгӯии мавсимӣ ба фасли баҳорро омода созад», – гуфт дар анҷом М.Сафаров.

Реклама на asia+

Душанбе. 6-уми январ. ОИ «Азия-Плюс» – Шаби гузашта дар сарҳади Тоҷикистону Афғонистон миёни марзбонони тоҷик ва қочоқбарони афғон задухӯрди мусаллаҳона ба вуқӯъ пайваст.

Тавре аз Сарраёсати нерӯҳои марзбонии Кумитаи давлатии амнияти миллии ҷумҳурӣ ба ОИ «Азия-Плюс» хабар доданд, дар натиҷаи задухӯрди мусаллаҳона се шаҳрванди афғон ба ҳалокат расиданд. Онҳоро Нозукмеҳр валади Вакил Акбар – сокини шаҳри Имом Соҳиб Сӯфӣ роҳбарӣ мекардааст. «Тибқи маълумоти хадамоти махсуси Тоҷикистон гурӯҳи мазкур тайи муддати тӯлонӣ ба интиқоли маводи мухаддир аз Афғонистон ба Тоҷикистон машғул будааст», – гуфт манбаъ.

Ба иттилои манбаъ, дар макони задухӯрд 22 кило маводи мухаддири иборат аз 14 кило ҳероин, 4 кило афюн, 4 кило ҳашиш ва автомати навъи Калашников дарёфт шудааст. Миёни марзбонони тоҷик касе зарар надидааст.

Реклама на asia+

Душанбе. 6-уми январ. ОИ «Азия-Плюс» – Сарфи назар аз нигаронии аҳолии ҷумҳурӣ бинобар норасоии шадиди пули нақд дар банкоматҳо, бонкҳои Тоҷикистон ҷой доштани чунин мушкилотро рад месозанд.

Тавре раиси маркази робита бо ҷомеа ва рекломи ҶСК «Агроинвестбонк» Исматулло Саидов ба ОИ «Азия-Плюс» хабар дод, ҳамаи ин овозаҳо буда, онро бонкҳои рақиб паҳн мекунанд». «Ахири соли гузашта ба иллати таъсири бӯҳрони ҷаҳонии молиявӣ ба шарикони мо дар кишварҳои дигар чунин мушкилот ҷой дошт ва муштариёнро лозим омад, барои гирифтани пули нақд чаҳор рӯз сабр кунанд, вале феълан ин мушкилот пурра роҳи ҳалли худро ёфтааст ва дар ҳамаи 51 адад банкоматҳои бонк дар кишвар айни замон ба қадри кофӣ пули нақд ҳам бо доллари амрикоӣ ва ҳам бо сомонӣ мавҷуд аст», – гуфт ӯ.

Ба гуфтаи ӯ, муштариёни бонк бемалол метавонанд барои пардохти маблағ дар 59 нуқтаи фурӯш, ки терминалҳои бонк мавҷуданд, аз корти плостикӣ тавассути пардохти ғайринақдӣ истифода намоянд.

Дар ҳамин ҳол, роҳбари хадамоти матбуоти бонки тиҷоратии дигар – ҶСК «Тоҷиксодиротбонк» Қурбон Восиев низ изҳор дошт, ки ҳақиқатан ахири соли гузашта чуни мушкилот рӯи кор омад, вале он муваққатӣ буда, айни замон пурра ҳал шудааст.

Ба қавли Қ.Восиев, он замон ба иллати овозаҳои бардурӯғи наздик омадани бӯҳрони молиявӣ ва хонабардӯш шудани бонкҳои кишвар ва ҳамчунин наздикшавии соли нав бо сабабҳои маълум ба аҳолӣ пули нақд бештар лозим шуд ва кормандони бонк на ҳама вақт имкон доштанд, банкоматҳоро бо пули нақд тъмин созанд. «Имрӯз пас аз гузашти ид мардум эътимод ҳосил кард, ки ба бонки мо муфлисшавӣ таҳдид намекунад ва банкоматҳои «Тоҷиксодиротбонк» ба таври маъмуливу мунтазам кор мекунанд», – афзуд ӯ.

Чунин овозаҳои норасоии пули нақдро дар ҶСК «Ориёнбонк» ва ҶСК «Бонки рушди Тоҷикистон» низ рад сохтанд.

Реклама на asia+