Душанбе. 26-уми август. ОИ «Азия-Плюс» – Раиси Бонки содироту воридоти Чин Ли Жуогу дар мулоқот бо рӯзноманигорон изҳор дошт, ки бонк шартномаҳои аз ҷониби ҳукуматҳои Тоҷикистону Чин баимзорасидаро ба иҷро хоҳад расонд.

Ӯ зикр намуд, ки зимни дидору мулоқот бо президенти Тоҷикистон



 

масоили рафти корҳо дар се лоиҳаи бузурги инвеститсионии Тоҷикистон- сохтмони хатҳои баландшиддати интиқоли нерӯи барқи Ҷануб-Шимол, Лолазор-Хатлон, азнавсозии роҳи мошингарди Душанбе-Хуҷанд-Чаноқ бо нақби Шаҳристон ва иншооти зиддитармавӣ, ки аз ҷониби бонк сармоягузорӣ мешаванд, мавриди баррасӣ қарор гирифтанд.

«Барои татбиқи лоиҳаи мазкур ҷониби Чин 603,5 млн. доллари амрикоӣ қарзи имтиёзнок ҷудо кардааст, ки 133 миллион долллари амрикоии он аллакай азхуд карда шуданд», – гуфт раиси бонк ва таъкид сохт, ки зимни мулоқот бо президенти Тоҷикистон атрофи сохтмони якчанд нерӯгоҳҳои обиву барқӣ дар Тоҷикистон бо дастгирии молиявии Чин низ ибрози назар карда шуд.

Реклама на asia+

Душанбе. 25-уми август. ОИ «Азия-Плюс» – Имрӯз зимни нишасти матбуотӣ раиси Ҳизби Сотсиал-Демократии Тоҷикистон

 

(ҲСДТ) Раҳматилло Зойиров изҳор дошт, ки Ҳукумати Тоҷикистон ва мақомоти маҳаллии ҳокимияти давлатӣ ба ҳамкории созанда омода нестанд.

Мавсуф зикр кард, ки зимни баррасии тарзи муносибати ҳокимияти расмӣ бо ҳизб дар муддати панҷ моҳи ахир ӯ ба чунин хулоса омадааст, «ҳарчанд моҳи марти соли равон ҳизб бобати тағйироти тактика ва стратегияи фаъолияти худ ва гузаштан ба ҳамкории пурраи созанда бо ҳукумат изҳорот пахш карда буд».

Ба қавли ӯ, аз рӯзҳои нахустини таъсис ҳизб бо ҳукумат на дар фазои мухолифати оштинопазир, ки «мухолифони аз созандагӣ дури ҲСДТ чунин тасвир карданӣ мешаванд», балки дар фазои ҳамкории созанда фаъолият кардааст.

«Дар самти риояи волоияти қонун ва иҷрои бечунунчарои он, ки Конститутсияи кишвар онро тақозо мекунад, ҲСДТ ба ҳеҷ гузашту гуфтушуниде роҳ надодааст», – таъкид сохт раиси ҳизб.

Р.Зойиров зикр кард, ки тайи моҳҳои апрел-августи соли 2008 бо мақсади ҷустуҷӯи роҳу воситаҳои раҳоии кишвар аз «бӯҳрони муратттаби кунунӣ» ҳизб дар мавзӯъҳои иҷтимоиву иқтисодӣ беш аз 60 семинар, мизҳои мудаввар, мулоқоту дидор ва мубоҳисаҳои ошкор гузаронидааст.

Ба қавли ӯ, мавқеи ҳизб дар рӯйдодҳои Исфара, Вилояти Мухтори Кӯҳистони Бадахшон (ВМКБ), Рашт ва Кӯлоб куллан созанда буд. «Моҳи июни соли ҷорӣ маҳз барои роҳ надодан ба нақзи тартиботи ҷамъиятӣ, иғвову дасисабозӣ ва хунрезӣ ҲСДТ гирдиҳамоиро дар шаҳри Хоруғ таҳти роҳбарии худ гирифт, ҳарчанд ин гирдиҳамоӣ бо ташабббуси ҳизб сурат нагирифта бошад ҳам, – гуфт Р.Зойиров. – Ба туфайли он сарчашмаи ташаннуҷи вазъ ором гардида, таваҷҷӯҳи ҳукумат ба мушкилоти мубрами сиёсати минтақавӣ равона карда шуд».

Р.Зойиров изҳор дошт, ки таҷрибаи амалӣ ва тамоили рушди равандҳо дар моҳҳои апрел-августи соли 2008, муносибати ҳукумат ва мақомоти маҳаллии ҳокимияти давлатӣ ва Кумитаи давлатии амнияти миллӣ гувоҳи онанд, ки марҳилаи нави таъқибот ва ҷорисозии маҳдудиятҳо нисбат ба ҳизб, аъзои он ва чорабиниҳои дарназардоштаи он (бахусус дар ВМКБ) зуҳур меёбад. «Ҳукумати Тоҷикистон ва мақомоти маҳаллии ҳокимияти давлатӣ ба ҳамкории созанда дар асоси баробарҳуқуқӣ, риояи қонун, ошкорбаёнӣ ва шаффофият омода нестанд, ки ин дар шароити имрӯзаи рушди равандҳои идораи муштараки кишвар аз ҷониби давлат ва ҷомеа, ғайримутамарказ гардонидани идораи давлатӣ ва молия, баланд бардоштани нақш ва аҳамияти худидоракунии маҳаллӣ дастгоҳи ҳукуматиро аз таъиноти иҷтимоии он дур меандозад», – афзуд раиси ҲСДТ.

Реклама на asia+

             Душанбе. 25 -уми август. ОИ «Азия-Плюс» – Зиёиёни тоҷик аз ҳукумати Тоҷикистон дархост карданд, ки ба шоир ва сиёсатмадори афғон Латифи Пидром паноҳгоҳи сиёсӣ диҳад.

           

Аз Иттифоқи нависандагони Тоҷикистон ба ОИ «Азия-Плюс» хабар доданд, ки ахиран гурӯҳҳои тундгарои Афғонистон бо мақсади паст кардани обрӯву эътибори сиёсатмадор ва адиб Л.Пидром иқдомоти тӯҳматангез роҳандозӣ мекунанд.

           

«Тӯли 15 соли ахир шоир Латиф Пидром аъзои раёсати Ҷамъияти форсизабонони ҷаҳон – «Пайванд» буда, дар як вақт ҳамчунин ба Конгресси миллии Афғонистон роҳбарӣ мекунад», – изҳор дошт манбаъ.

           

Тибқи назари зиёиёни эҷодкори Тоҷикистон, таъқиботи Л.Пидром пас аз изҳороти ӯ оид ба мушкилоти аққалиятҳои миллӣ ва риояи ҳуқуқи занон дар ин кишвар оғоз ёфтааст.

«Ахиран барои интиқоди ӯ аз фаъолияти амири Афғонистон Амонуллохон, ки аввали қарни ХХ аз ҷониби ҳизби «Афғон миллат» дар кишвар ҳукмронӣ кардааст, таъқибот шадидтар гаштааст», – таъкид сохт сарчашма.

Реклама на asia+

Хоруғ. 25-уми август. ОИ «Азия-Плюс» – Рӯзи шанбеи ҳафтаи гузашта беш аз 50 нафар фарзандони кормандони муассисаҳои тибии Вилояти Мухтори Кӯҳистони Бадахшон (ВМКБ) барои истироҳат ба осоишгоҳи бемориҳои дили «Ҳушёрӣ»-и ноҳияи Варзоб рафтанд.

Дар мусоҳиба бо хабарнигори ОИ «Азия-Плюс» сардори Раёсати тандурустии вилоят Шодӣ Ҷамшедов изҳор дошт, ки вазорати тандурустии ҷумҳурӣ ҷиҳати ба осоишгоҳ бурдан ва аз он ҷо овардани кӯдакон нақлиёти мусофирбар (автобус) ҷудо кардааст. Кӯдаконро мутахассисони вазорат ва кормандони раёсати тандурустии вилоят ҳамроҳӣ мекунанд.

Кӯдакон дар осоишгоҳ тайи 7 то 10 рӯз истироҳат хоҳанд кард. Пардохти ҳамаи маблағи хароҷот ва истироҳати кӯдаконро Вазорати тандурустии Тоҷикистон ба ӯҳдаи худ гирифтааст.

Реклама на asia+

Душанбе. 25-уми август. ОИ «Азия-Плюс» – Имрӯз дар шаҳри Душанбе оид ба мавзӯи «Тағйирёбии иқлим ва таҳаввули намуди сатҳи замин дар кӯҳҳои минтақаи Осиёи Марказӣ: гузашта, имрӯз ва оянда» конфронси байнулмилалӣ ба кор шурӯъ мекунад. Конфронс ба 80-умин солгарди баргузории маъмурияти (экспедититсия) илмии Русияву Олмон дар кӯҳҳои Помиру Олой бахшида шудааст.

Аз Академияи улуми Тоҷикистон ба ОИ «Азия-Плюс» хабар доданд, ки дар конфронс натоиҷи таҳқиқоти илмиву амалии олимони минтақа ҷиҳати азхудкунӣ ва истифодаи захираҳои табиии минтақаи Осиёи Марказӣ мавриди таҳлил қарор мегиранд.

Конфронси байнулмилалӣ аз ҷониби Донишгоҳи шаҳри Байройти Олмон бо дастгирии Вазорати умури хориҷии Олмон созмон дода мешавад.

Реклама на asia+

Душанбе. 25 август.

 

ОИ «Азия-Плюс» – Ҳукумати Канада ба Ташкилоти ғайридавлатии шаҳри Душанбе «Тавозуни зиндагӣ» ҷиҳати дастгирии шахсоне, ки аз инфиҷори минаҳо захм бардоштаанд, ба андозаи 14 ҳазор доллари Канада ёрӣ расонд. Маблағи мазкур барои ифтитоҳи истироҳатгоҳи махсус барои маҷрӯҳон сарф карда мешавад. Истироҳатгоҳ барои 22 нафар пешбинӣ шуда, дар басти аввал 22 шахси маҷрӯҳшуда дар осоишгоҳи «Садбарг» табобат карда мешаванд.

Ҳукумати Канада барномаҳои тоза кардани минаҳо дар Тоҷикистон ва мамлакатҳои дигари ҷаҳонро маблағгузорӣ менамояд. Ҳукумати ин кишвар бо дастгирии Бунёди кӯмакҳои башардӯстонаи Швейтсария ва Созмони Амнияту Ҳамкории Аврупо муддати 10 сол ба Тоҷикистон барои безарар гардондани минаҳо кӯмак мерасонад.

Сафири Канада дар Тоҷикистону Қазоқистон ва Қирғизистон хонум Маргарет Скок изҳор намуд, ки ҳукумати мамлакаташ фаъолияти ташкилоти «Тавозуни зиндагӣ» – ро ҷиҳати барқарор сохтани саломатии осебдидагон дастгирӣ менамояд.

Реклама на asia+