Душанбе. 6-уми август ОИ «Азия-Плюс» – Субҳи имрӯз роҳбари Хадамоти федеролии амнияти Русия Алексей Бортников ҷиҳати боздиди корӣ ба Душанбе омад.

Аз дафтари матбуоти сарвари давлат ба ОИ «Азия-Плюс» хабар доданд, ки дар нимаи аввали рӯз мулоқоти А.Бортников бо президенти Тоҷикистон Эмомалӣ Раҳмон доир мегардад.

Бино ба иттилои манбаъ, дар мулоқот масоили ҳамкории муштараки хадамоти амниятии кишварҳо дар мубориза алайҳи терроризми байнулмилалӣ, қочоқи маводи мухаддир ва муҳоҷирати ғайриқонунӣ мавриди баррасӣ қарор хоҳанд гирифт.

Ҳамчунин вохӯрии А,Бортников бо раиси Кумитаи давлатии амнияти миллии Тоҷикистон Хайриддини Абдураҳимов ба нақша гирифта шудааст.

Душанбе. 6-уми август. ОИ «Азия-Плюс» – Дар шаш моҳи соли ҷорӣ даромади софи Ҷамъияти саҳомии кушодаи «Бонки Эсхата» дар қиёс ба ҳамин давраи соли гузашта ба андозаи 71 фоиз афзуда, 4 миллион сомониро (беш аз $1 миллион) ташкил дод.

Аз бонки мазкур ба ОИ «Азия-Плюс» хабар доданд, ки дар ин давра дороиҳои бонк тақрибан 117 фоиз афзуда, аз 236 миллион сомонӣ зиёдтар шуданд. Сармояи бонк то 47 миллион сомонӣ расидааст. Ин рақам соли гузашта ба 24 млн. сомонӣ баробар буд.

Тибқи маълумоти сарчашма, сандуқи қарзии бонк нисбат ба ҳамин давраи соли гузашта 140 фоиз бештар гардида, 138 миллион сомониро ташкил медиҳанд.

«Яке аз самтҳои афзалиятноки фаъолияти бонк ҷалби

 

маблағҳои аҳолӣ мебошад, – идома дод манбаъ. – Агар дар ҳамин давраи соли гузашта сандуқи депозитии бонк ба 30 миллион сомонӣ баробар буд, пас соли равон он ба 50 миллион сомонӣ расидааст».

Зикр гардид, ки айни замон бонк бо тамоми низомҳои байнулмилалии интиқоли маблағҳои пулӣ ҳамкорӣ мекунад ва дар қаламрави ҷумҳурӣ ҳудуди 100 нуқтаҳои интиқоли маблағҳои пулӣ фаъолият доранд, ки тавассути кори пурсамари онҳо ҳаҷми интиқоли маблағҳои пулӣ ба 180 миллион доллари амрикоӣ расидааст. Таъкид гардид, ки нишондиҳандаҳои асосии фаъолияти бонк бозгӯи таҳкими устувории молиявӣ ва афзоиши ҷалби сармоягузорӣ мебошад.

Дар қаламрави ҷумҳурӣ бонк дорои 8 шӯъба ва 100 нуқтаи интиқоли маблағҳои пулӣ аст. «Рӯзҳои наздик мувофиқи қарори раёсати Бонки миллӣ боз 5 шӯъбаҳои баҳисобгириву қарзии бонк ба шӯъбаҳои комил табдид дода мешаванд», – афзуд сарчашма.

Душанбе. 6-уми август. ОИ «Азия-Плюс» – Аз 218 ҳазору


390 гектар

майдони кишти зироати ғалладона то имрӯз дар 157 ҳазору 60 гектараш ҳосил ҷамъоварӣ карда шуд, ки ин беш аз 70 фоизи ҳосили гандумро ташкил медиҳад. Сухангӯи вазорати кишоварзии Тоҷикистон Нарзулло Додобоев ба ОИ «Азия-Плюс» хабар дод, ки гандуми 140 ҳазору

954 гектар

кӯфта шудааст.

Ба гуфтаи ӯ, ҳосили даравидаи гандум 268 ҳазор тоннаро ташкил додааст. Соли гузашта ин рақам ба 203 ҳазору 342 тонна баробар буд. «Ҳосилнокии миёна аз ҳар гектар 19 сентнер аст», – гуфт ӯ.

Мувофиқи маълумоти вазорат, аз майдони умумии кишти зироати ғалладона, ки 284 ҳазору 237 гектарро ташкил медиҳад, дар 173 ҳазору

948 гектар

ҳосил ҷамъоварӣ карда шудааст. Ҳаҷми умумии ҳосили кӯфташудаи зироати ғалладона ба беш аз 295 ҳазор тонна расидааст, ки нисбат ба ҳамин давраи соли гузашта 21 ҳазор тонна зиёдтар аст. Аз вазорат иттилоъ доданд, ки соли равон норасоии зироати ғалладона пешбинӣ намегардад, зеро нисбат ба соли гузашта 30 фоиз бештар чунин зироат кишт карда шудааст. «Айни замон кишти такрорӣ гузаронида мешавад», – афзуд сарчашма.

Душанбе. 6-уми август. ОИ «Азия-Плюс» – Аз Вазорати корҳои хориҷии Тоҷикистон ба ОИ «Азия-Плюс» хабар доданд, ки дар даҳаи аввали моҳи август ҳайати энергетикҳои Ҳиндустон барои ҳалли масъалаҳои марбут ба тҷдиду бозсозии нерӯгоҳи обиву барқии «Варзоб» ба шаҳри Душанбе. меоянд.

Зикр гардид, ки зимни сафар масъалаи татбиқи ёддошти тафоҳум оид ба бозсозии нерӯгоҳ, ки соли гузашта миёни вазорати корҳои хориҷии Ҳиндустон ва вазорати энергетикаву саноати Тоҷикистон ба имзо расида буд, мавриди муҳокима қарор мегирад. Барои амалисозии он ҳукумати Ҳиндустон 13 миллион доллари амрикоӣ бурс ҷудо кард.

«Ҳангоми боздиди ҳайати Ҳиндустон ҳамчунин масъалаи интиқоли гидротурбинаҳои сохташуда дар корхонаҳои Ҳиндустон ва таҳияи реҷаи кории иваз намудани онҳо ҳал хоҳад гардид», – изҳор дошт манбаъ.

Ёдрас мекунем, ки мувофиқи маълумоти коршиносон, бо таҷдиди нерӯгоҳ имкон пайдо хоҳад шуд, ки иқтидори истеҳсолии он аз 2,3 МВт то 4,4 МВт зиёдтар карда шавад. Нерӯгоҳи «Варзоб» соли 1936 мавриди истифода қарор гирифта, нерӯгоҳи аввалин дар Тоҷикистон маҳсуб мегардад.

Душанбе. 5-уми август. ОИ «Азия-Плюс» – Раиси Ҳизби наҳзати исломии Тоҷикистон (ҲНИТ) Муҳиддин Кабирӣ, ки ҳафтаи ахир дар Туркия қарор дошт, бо даъвти доираҳои сиёсии Судон ба ин кишвар сафар намуд.

Роҳбари маркази таҳлилии ҲНИТ Ҳикматулло Сайфуллозода ба ОИ «Азия-Плюс» хабар дод, ки ҳамин моҳ М.Кабирӣ ба Малайзия низ сафар хоҳад кард. Ба гуфтаи ӯ, раиси ҳизбро доираҳои сиёсиву илмии кишварҳои номбурда даъват мекунанд. «Зимни боздидҳо раиси ҳизб бо намояндагони доираҳои сиёсии ин кишварҳо мулоқот ороста, бо маърӯзаҳо баромад мекунад ва бо донишҷӯёни тоҷики муқими он ҷо вохӯрӣ доир месозад», – гуфт Ҳ.Сайфуллозода.

«Охири моҳи август сафари раиси ҳизб ба як қатор шаҳрҳои Русия ва мулоқоти ӯ бо муҳоҷирони меҳнатии тоҷик ба нақша гирифта шуда буд, вале ин сафарҳо онро ба таъхир меандозанд ва акнун лозим меояд, ки моҳи сентябр ин корро анҷом дод», – афзуд ӯ.

Душанбе. 5-уми август. ОИ «Азия-Плюс» – Корхонаи воҳиди давлатии (КВД) «Тоҷикгаз» қисман қарзи истифодаи газро ба маблагӣ 3 миллион доллари амрикоӣ ба Ӯзбекистон пардохт намуд.

Мудири кулли корхона Фатҳиддин Мӯҳсиддинов ба ОИ «Азия-Плюс» хабар дод, ки айни замон корхона боз 5 миллион доллари амрикоӣ аз Ӯзбекистон қарздор аст.

«Қаблан ба Тоҷикистон дар як соат то 10 ҳазор метри мукааб газ интиқол дода мешуд, айни замон бошад, он то 20 ҳазор метри мукаабро ташкил медиҳад», – гуфт ӯ.

Мавсуф изҳор дошт, ки феълан газро дар ҳаҷми пурра

 

танҳо Корхонаи воҳиди давлатии «Талко» ва қисман КВД-и «Тоҷиксемент» истифода мебаранд.

Қарздорони асосии «Тоҷикгаз» ширкати саҳомии холдинги кушодаи «Барқи Тоҷик» ($2,7 млн.) ва КВД «Тоҷиксемент» ($1 млн.) мебошанд.