Кӯлоб. 19-уми июл. ОИ «Азия-Плюс» – Вазорати тандурустӣ ҷиҳати баргузории чорабиниҳои пешгирии бемории варами шуш ба минтақаи Кӯлоб 8 ҳазор адад вактсинаҳои зидди ин бемориро фиристод.

Сардухтури беҳдоштии минтақаи Кӯлоб Саид Давлатов ба ОИ «Азия-Плюс» хабар дод, ки истифодаи вактсина миёни кӯдакони синни аз 2-сола боло ва шаҳсони аз 65-сола боло гузаронида мешавад.

«Ҳамчунин нисбат ба беморони қанд, зиққи нафас, дил ва гирифтори нашъамандӣ низ чораҳои пешгирӣ гузаронида мешаванд», – гуфт ӯ ва афзуд, ки бештари чунин беморон дар ноҳияҳои Восеъ, Ҳамадонӣ ва Фархор ба қайд гирифта шудаанд.

«Вактсинаҳо ба ноҳияҳо фиристода шуданд ва дар анборҳои махсус нигаҳдорӣ мешаванд, – идома дод ӯ. – Ба нахустин эҳтиёҷмандон аллакай тавассути ин вактсина кӯмаки тиббӣ расонида шуд».

Душанбе. 19-уми июл. ОИ «Азия-Плюс» – Дар шаш моҳи соли ҷорӣ аз Тоҷикистон ба хориҷи кишвар 77 ҳазору 369 тонна сабзавоту меваҷот содирот карда шудааст, ки 5 ҳазор аз он маҳсулоти консервшуда мебошад.

Муовини вазири кишоварзии Тоҷикистон Маҳмуд Қодиров дар нишасти матбуотӣ изҳор дошт, ки содироти махсулоти мевагӣ дар ин давра нисбат ба нишондиҳандаҳои ҳамин давраи соли гузашта ба андозаи 1 ҳазору 152 тонна ё худ 46,7 фоиз зиёдтар аст. Зикр гардид, ки содироти гелос ду баробар (173 тонна) ва зироати полизӣ 84,4 фоиз дар муқоиса ба ҳамин давраи соли гузашта афзудааст.

Мувофиқи маълумоти Хадамоти давлатии назорат, фитосанитарӣ ва карантини назди вазорати кишоварзӣ, дар нимсолаи аввал маҳсулоти содиротшуда аз кишвар 184 ҳазору 186 тоннаро ташкил додааст, ки беш аз 34 ҳазори он меваи хушк мебошад.

Душанбе. 19-уми июл. ОИ «Азия-Плюс» – Шоми дирӯз дар вазъи тантанавӣ бинои нави сафоратхонаи Олмон дар Тоҷикистон мавриди истифода қарор гирифт.

Сафири Олмон дар Тоҷикистон Райнер Мюллер ба сохтмончиёни бино изҳори миннатдорӣ намуда, онро иншооти муштараки Тоҷикистону Олмон номид.

«Сохтмони бинои мазкур шаҳодати он аст, ки Олмон минбаъд низ барои Тоҷикистон шарики боэътимод хоҳад монд ва ҷиҳати рушду тавсиаи ҳамкориҳо дар чаҳорчӯбаи стратегияи Иттиҳоди Аврупо тамоми кӯшишҳоро ба харҷ хоҳад дод», – таъкид сохт ӯ.

Ӯ ёдовар шуд, ки соли гузашта таҳти раисии Олмон стратегияи нави Иттиҳоди Аврупо оид ба Осиёи Марказӣ қабул шудааст ва изҳори боварӣ намуд, ки ҳамакнун бо раисии Фаронса дар иттиҳод ба татбиқи ин стратегия вусъати тоза бахшида хоҳад шуд.

Р.Мюллер ҳамчунин иттилоъ дод, ки ваколати сафириаш дар кишвари мо ба анҷом мерасад ва ӯ аз ин пас ба Африқои Марказӣ меравад.

«Мо дар Тоҷикистон дӯстони зиёде пайдо кардем ва ин кишварро бо дили нохоҳам тарк менамоем», – афзуд ӯ. Ҳамсари сафир бо забони олмонӣ рубоии Абӯабдулло Рӯдакиро дар бораи дӯстӣ назди ҳозирин қироат кард.

Вазири корҳои хориҷии Тоҷикистон Ҳамрохон Зарифӣ зимни суханрониаш аз кӯмаки Олмон, иштироки раиси кумитаи парлумонии ҳамкории Олмон-Осиёи Марказӣ дар маросим изҳори миннатдорӣ намуда, хотиррасон сохт, ки Олмон яке аз аввалин кишварҳоест, ки дар Тоҷикистон сафорати худро ифтитоҳ кардааст.

Ҳ.Зарифӣ муносиботи ҳамкории Тоҷикистону Олмонро дар сатҳи баланд арзёбӣ намуда, таъкид сохт, ки Олмон дар чаҳорчӯбаи стратегияи нави Иттиҳоди Аврупо ба Тоҷикистон дар масоили рушди энергетика ва истифодаи оқилонаи захираҳои обӣ кӯмаки зиёд мерасонад ва изҳори боварӣ кард, ки Фаронса низ дар чунин самт муносиботи ҳамкориҳоро ба роҳ хоҳад гузошт.

Ба ҳозирин консерти дастаҳои ҳунарӣ ва ҳунармандони касбии шаҳри Душанбе намоиш дода шуд.

Дар маросими ифтитоҳи бинои сафорат намояндагони аҳзоби сиёсӣ, арбобони илму фарҳанг, фаъолони ҷамъиятҳои дӯстӣ, роҳбарони ҷамъияти аққалиятҳои миллии ҶТ, намояндагони корпуси дипломатии муқими кишвар ва рӯзноманигорон иштирок доштанд.

Душанбе. 19-уми июл. ОИ «Азия-Плюс» – Дар моҳи апрели соли ҷорӣ музди миёнаи меҳнат дар тамоми соҳаҳои иқтисоди Тоҷикистон 219,96 сомониро ($64,3) ташкил дод, ки нисбат ба ҳамин давраи соли гузашта 39,8 фоиз бештар мебошад.

Муовини вазири меҳнат ва ҳифзи иҷтимоии Тоҷикистон Субҳониддин Ашӯров дар нишасти матбуотӣ изҳор дошт, ки музди меҳнати миёнаи баландтарин дар шаҳри Душанбе (471,09 сомонӣ) ба қайд гирифта шудааст.

Ба гуфтаи ӯ, дар соҳаи истеҳсоли неъматҳои моддӣ музди меҳнати миёнаи баландтарин дар соҳаи алоқа (568,83 сомонӣ) буда, пасттарин дар соҳаи хоҷагии ҷангал ва кишоварзӣ (мутаносибан 54,77 ва 56,60 сомонӣ) аст.

«Дар соҳаи ғайриистеҳсолӣ музди меҳнати баландтаринро (1 ҳазору 15 сомонӣ) кормандони соҳаи андоз ва молия мегиранд», – зикр кард ӯ.

Муовини вазир баён дошт, ки айни замон дар Тоҷикистон 530 ҳазор нафақахӯрон ба сар мебаранд, шумораи нафарони машғули кор 784 ҳазорро ташкил медиҳад. «Дар сурати аз рӯи меъёрҳои байнулмилалӣ ба 1 нафақахӯр рост омадани 4 коргар чунин ҳолат он қадр мусоид нест, зеро дар Тоҷикистон ин таносуб қариб «як ба як» аст», – афзуд ӯ.

 

Душанбе. 19-уми июл. ОИ «Азия-Плюс» – Мудири лабораторияи пажӯҳишгоҳи гидроэнергетика ва экологияи Академияи улуми Тоҷикистон Георгий Петров изҳор дошт, ки феълан минтақаи шимоли кишвар аз норасоии об танқисӣ мекашад, ҳарчанд дар рӯдхонаи Сир сатҳи об мисли солҳои пешин аст.

Ба гуфтаи ӯ, чунин ҳолат ба он марбут аст, ки миёни Қирғизистону Ӯзбекистон бобати истифодаи об тавофуқ ҳосил нашудааст ва Қирғизистон дар болооби рӯдхонаҳо обро аз маҷрои умумӣ ба ҷои дигар равона мекунад.

«Тоҷикистон аз ин масъала канор аст, вале мутаассифона, шахсони мутасаддии гуфтушунидҳо натавонистанд инро собит созанд, – гуфт ӯ. – Гузашта аз ин, онҳо ҳатто чунин масъалагузорӣ карда натавонистанд».

Г.Петров зикр кард, ки акнун обро на танҳо аз Ӯзбекистн, балки аз Тоҷикистон ҳам гирифта истодаанд.

Перомуни масъалаи истифодаи обҳои фаромарзӣ Г.Петров изҳор намуд, ки дар маҷмӯъ, «ҳар кишвар мувофиқи салоҳдиди худ аз он истифода бурда метавонад, вале зимни рушди ягон чизе ё соҳае бо истифода аз он бояд манфиатҳои кишварҳои ҳамҷаворро низ ба назар гирад».

«Дар соҳаи истифодаи нерӯи барқ низ ҳолат чунин аст: Тоҷикистон ягона кишварест, ки тавонистааст бо Қазоқистону Ӯзбекистон оид ба хизматрасониҳо ба қарордоде ояд ва ҳамчунин бо пардохт тавассути интиқоли нерӯи барқ низ», – идома дод ӯ.

«Мушкилоти обҳои фаромарзӣ дар Тоҷикистон мушкилоти касбӣ ва созгор омада натавонистан аст», – афзуд олим.