Санҷиши гурӯҳи кории Вазорати маориф ва илми Тоҷикистон маълум кардааст, ки воқеан, Файзихон Раҷабова, омӯзгори мактаби №8 шаҳри Ваҳдат аз ҷониби модари яке аз хонандагони синфи 8 мавриди латукӯб қарор гирифта, ҳоло дар беморхона бистарӣ аст. Ин ниҳод гуфтааст, латукӯби Раҷабова “қонунвайронкунии ҷиноятӣ” мебошад.
Маркази матбуоти вазорат ба “Азия-Плюс” гуфт, Файзихон Раҷабова, омӯзгори фанни таърих ва ҳуқуқи ин мактаб рӯзи 5-уми октябри соли равон аз ҷониби Фируза Сармисоқова, модари Шаҳзода Муминова, хонандаи синфи 8 “г”-и муассиса латукӯб шудааст.
Ҳодиса баъди он сар задааст, ки Шаҳзода Муминова дар дарси “Асосҳои давлат ва ҳуқуқ” раванди дарсро чанд маротиба вайрон карда, ба таъкидҳои муаллим баръакс вокуниш нишон додааст.
“…дар раванди дарс вобаста ба якчанд ҳолатҳои вайронкунии дарс омӯзгор аз хонанда Муминова Шаҳзода эрод гирифта, хонанда бошад, худро ислоҳ накарда ба эродҳои омӯзгор вокуниш нишон медиҳад, ки дар натиҷа байни онҳо баҳс ба миён омада, муаллима маҷбур мешавад, ки ба рафтори хонанда баҳои “2” гузорад”, – гуфта мешавад дар вокуниши вазорат.
Ба иттилои ин ниҳод, вақте ки модари хонанда аз баҳси фарзандаш бо муаллим огоҳ мешавад, “бо мақсади танбеҳи омӯзгор” ба мактаб рафта, “дар дохили синфхона бо Файзихон Раҷабова ҷанҷол намуда, омӯзгорро зери латукуб қарор додааст”.
Модари хонанда замоне аз баҳс огоҳ шудаст, ки Муминова Шаҳзода ҳамроҳи ҳамсинфону хонандагони мактаб барои таҷлили зодрӯзаш ба хонааш рафтаанд.
Гурӯҳи кории вазорат бо такя ба Иттифоқи касабаи ин мактаб навиштааст, ки Файзихон Раҷабова 4 сол боз дар муассиса кор мекунад ва “муносибаташ бо аҳли кормандон ва хонандагон хуб буда, ягон арзу шикояд нисбати ӯ то ин дам ба Иттифоқи касаба ворид нагардидааст”.
Файзихон Раҷабова дар робита ба ҳодисаи мазкур ба Шуъбаи корҳои дохилии шаҳри Ваҳдат муроҷиати расмӣ кардааст ва ҳоло тафтиши ҳодиса идома дорад.
Гурӯҳи кории вазорат бо кормандони мактаби №8 мулоқот карда, ҳамчунин, аз аҳволи Раҷабова Файзихон дар беморхона хабар гирифтаанд.
“Вазорати маориф ва илм амали Сармисоқова Фируза – модари хонандаи сини 8 “г”-и Муассисаи таҳсилоти миёнаи умумии №8 шаҳри Ваҳдатро маҳкум намуда, қайд менамояд, ки дар асоси моддаи 52 Қонуни Ҷумҳурии Тоҷикистон “Дар бораи маориф” шаъну шарафи омӯзгор таҳти муҳофизати давлат қарор дорад. Фаъолияти касбии омӯзгор танҳо дар доираи касбӣ, аз ҷониби шахсон ва мақомоти дахлдори давлатии соҳаи маориф баррасӣ карда мешавад”, – навиштааст вазорат
Ин ниҳод мегӯяд, латукӯби Файзихон Раҷабова “ҳамчун амали ғайриқонунӣ ҳисобида шуда, илова ба асосҳои болозикр ҳамчунин қонунвайронкунии ҷиноятӣ ҳисобида мешавад, ки айни ҳол аз ҷониби мақомоти корҳои дохилӣ мавриди баррасӣ қарор дорад”.
Ёдовар мешавем, ки Файзихон Раҷабова бо нашри як муроҷиатнома аз Рустами Эмомалӣ, шаҳрдори Душанбе ва раиси Маҷлиси миллии Тоҷикистон хоста буд, ки ҳодисаи латукӯби ӯ аз ҷониби волидайни як хонанда таҳқиқ карда шуда, нисбати гунаҳкорон чора андешад.
