Калонтарин корхонаи маъдантозакунӣ – “Адрасмон”-и шаҳри Гулистон (Қайроқуми пешин), ки 12 сол боз аз кор монда ва садҳо сокини маҳаллиро бекор мононда буд, қарор аст дубора фаъол гардад. Ин корхона соли 2013 варшикаста шуда, дар пайи як баҳси додгоҳӣ аз моликони қазоқистонӣ гирифта шуду давлатӣ гардид.
Дар ин бора рӯзи 21-уми июл Илҳом Пӯлодзода, раиси шаҳри Гулистон дар нишасти матбуотӣ иттилоъ дода, гуфт, ки баъди солҳои тӯлонӣ ба калонтарин корхонаи маъдантозакунӣ дар минтақа сармоягузор ёфтаанд.
Қаблан корхонаи маъдани “Адрасмон” дар ихтиёри соҳибкорони Қазоқистон буд ва тӯли тақрибан 15 соли охир аз фаъолият бозмонда буд.
Ба қавли Пӯлодзода, баъди 12 сол як ширкати чинӣ омода шудааст, ки барои дигарбора ба кор андохтани он сармоягузорӣ кунад.
Илҳом Пӯлодзода гуфт, ҳоло корҳои васлкунӣ ҷараён дорад, он шахтаҳое, ки об зер карда буд, аз об тоза карда истодаанд.
“Барои коргарон хобгоҳ таъмир шуда истодааст ва роҳро таъмир кардаву дигар корҳоро ба анҷом расонида истодаем. Агар хато накунам, зиёда аз 50 миллион доллар сармоя ҷудо мегардад”, – гуфт шаҳрдори Гулистон.
Аммо ӯ дақиқан аз ширкати чинӣ ном нагирифт.
Ба гуфтаи Илҳом Пулодзода, то нимаи соли оянда корхона марҳила ба марҳила ба фаъолият мепардозад. Вале тафсилоти лоиҳа ба пуррагӣ маълум нест, ки аз чиҳо иборат аст ва то куҷо мушкили бекории сокинони Гулистон рафъ мешавад
“Адрасмон” чаро аз кор монд?
Корхонаи маъдани “Адрасмон” дар нимаи дуюми қарни 20 таъсис ёфта дар канори он шаҳраке ҳам бо ҳудуди 10 ҳазор аҳолӣ ба вуҷуд омад. Дар он замон “Адрасмон”-ро доштани бузургтарин кони нуқра шаҳраки “кӯҳканҳо” мегуфтанд. Фулузоти гаронбаҳо, аз ҷумла тиллову сурб (қурғошим) дар кӯҳҳои Қурама ва Қаромазори ҳамин минтақа ҷойгир буд.
Корхонаи “Адрасмон” дар давраи Шӯравӣ пурра фаъолият мекард. Баъди пош хӯрдани Иттиҳоди Шӯравӣ иқдидораш паст шуд. Соли 2006 ин корхонаро ширкати қазоқистонии "Кони Мансур" харид ва сармоягузорӣ кард. Аз соли 2006 то соли 2013 корхона бо 30-40% иқтидор кор мекард.
Аммо корхонаи “Адрасмон” дар соли 2013 худро муфлис эълон кард ва бо ҳамин дигар корхона пурра аз кор монд. Он вақт дар корхонаи маъдани “Адрасмон” ҳудуди 750 коргари маҳаллӣ соҳиби кору маоши хуб буданд. Ин корхона яке аз андозсупорандагони калон дар сатҳи ҷумҳурӣ ба шумор мерафт, ки ҳар сол ба буҷети кишвар то 12 миллион сомонӣ андоз месупорид.
Аммо ба далели пастравии арзиши нуқра дар бозори ҷаҳонӣ моликони қазоқистонӣ аз идомаи кор даст кашиданд ва соли 2018 дар пайи баҳси додгоҳӣ корхонаи маъдани “Адрасмон” ба давлат гузаронида шуд.
Дар бораи фаъолият ва қатъи кори “Адрасмон” дар маводи зерини “Азия-Плюс” бештар маълумот бигиред.
