Дар пайи панҷ заминларзае, ки давоми як шабонарӯзи ахир дар минтақаи Рашти Тоҷикистон рух дод, як нафар ҳалок шуда, 160 хонаи истиқоматӣ ва се мактаб зарар дидааст.
Ба навиштаи Кумитаи ҳолатҳои фавқулода ва мудофиаи шаҳрвандӣ (КҲФ), субҳи имрӯз, 14-уми апрел, соати 05:44 дар 18-километрии ноҳияи Рашт ва 156-километрии шаҳри Душанбе заминларзаи панҷум давоми як шабонарӯзи охир сабт шудааст.
Қувваи он дар маркази зилзила 3–4 балл ва дар ноҳияи Рашт 3 баллро ташкил додааст.
Ин ниҳод гуфтааст, ки дар пайи ин заминларза талафоти ҷонӣ ва харобиҳо ба қайд гирифта нашудаанд.
Аммо дар пайи 4 заминларзае, ки дирӯз, 13-уми апрел дар ин минтақа рух дод, як кӯдаки 3-сола ҷон бохта, 160 хонаи истиқоматӣ ва се мактаб зарар дидааст.
Заминларзаи аввал соати 9:24 дар 21-километрии ноҳияи Рашт рух дод, ки қувваи он 5-6 балл буд.
Давоми рӯз заминларза ин минтақаро се маротибаи дигар такон дод:
Соати 12:14, маркази он 29-километрии шарқи ноҳияи Рашт, қувваи такон 4 балл;
Соати 13:33, маркази он 24-километрии шарқи ноҳияи Рашт, қувваи ларзиш 3 балл;
Сотаи 19:34, маркази зилзила 32-километрии шарқи ноҳияи Рашт, ларзиши замин 4–5 балл.
Дирӯз КҲФ навишт, ки дари пайи ин заминларзаҳо, Абдуғанӣ Машрабов, сокини сесолаи деҳаи Уштурпасти ноҳияи Рашт ҷон бохтааст. Ӯ ҳангоми заминҷунбӣ “зери девори хонаи истиқоматӣ монда, ба ҳалокат расидааст”
Субҳи имрӯз бошад, КҲФ навишт, ки дар деҳаҳои Сафедтундак, Гулханӣ, Кӯл, Аскалон ва Хулаки ноҳияи Рашт 40 хона пурра ва 5 хона қисман вайрон шудаанд. Инчунин, дар ҳудуди ин деҳаҳо 3 чойхона ва мактаби №56 зарар дидаанд.
Дар ноҳияи Тоҷикобод дар деҳаи Ғанишоби ҷамоати Калъаи Лаби Об ба 12 хона пурра, 15 хона қисман, 38 хона сатҳан, 30 иншооти ёрирасон ва 1 маркази тиббӣ зарар расидааст.
Ҳамчунин, дар дар деҳаи Анвари Каландарови ҷамоати Лангари Шоҳи ноҳии Тоҷикобод 6 хона пурра, 12 хона қисман, 2 хона сатҳан, 20 иншооти ёрирасон пурра ва 1 чойхона қисман осеб дидаанд.
Дар деҳаҳои Сари Чашма, Бӯстон ва Кӯликалони ин ноҳия бошад, 30 хона пурра, 10 хона қисман, 20 хона сатҳан, 1 мактаб ва 136 иншооти ёрирасон пурра ва 1 чойхона қисман осеб дидаанд.
Дар маҷмӯъ, гуфтаи КҲФ, дар ноҳияи Тоҷикобод 54 хона пурра, 45 хона қисман, 61 хона сатҳӣ, 2 мактаб, 196 иншооти ёрирасон, 3 чойхона ва 1 муассисаи тиббӣ зарар дидаанд.
Дар ин ноҳия талафоти ҷонӣ ба қайд гирифта нашудааст.
Манбаъ мегӯяд, бо супориши Эмомалӣ Раҳмон, раиси ҷумҳури Тоҷикистон комиссияи ҷумҳуриявӣ ташкил шуда, 13 апрел барои омӯзиши вазъ, муайян кардани хисорот ва ҳамоҳангсозии корҳои бартарафсозии паёмадҳои зилзила ба минтақаи Рашт рафтааст.
Бояд зикр кард, ки минтақаи Рашти Тоҷикистон манотиқи зилзилахез ба ҳисоб меравад.
Аз ҷумла, соли 2021 бар асари заминларза дар ноҳияи Тоҷикободи ин ин минтақа 5 нафар ба ҳалокат расида, 16 каси дигар ҷароҳат бардошта буданд.
