Суди ҳарбии гарнизони Душанбе сарбози қисми низомии 06870 «В»-и Вазорати мудофиаи Тоҷикистон Тоҷиддин Раҳматовро барои даст доштан дар куштори ҳамхизмати худ Азизҷон Мақсудов ба 9 соли зиндони низомаш шадид маҳкум кард.
Муовини раиси суди ҳарбии гарнизони Душанбе Хусрав Давлатзода ба «Азия-Плюс» дар ин робита иттилоъ дод, ки Тоҷиддин Раҳматов мутобиқи моддаи 104-и Кодекси ҷиноии ҶТ (Одамкушӣ) гунаҳкор дониста шудааст.
Санаи 2 марти соли ҷорӣ Тоҷиддин Раҳматов ҳангоми иҷрои вазифаи хизматӣ дар лагери солимгардонии «Баҳор»-и Вазорати мудофиа дар шаҳри Ваҳдат бо фарёди «мепарронам» мили автомати Калашниковро ба сӯи А.Мақсудов рост карда, аз он оташ мекушояд. Тир ба рӯи Мақсудов бархӯрда, ӯ дар ҷойи ҳодиса ба ҳалокат мерасад.
