Тоҷикистон ва Русия таъсиси намояндагии сохторҳои қудратӣ ва муҳоҷиратро дар қаламрави ҳамдигар баҳри таҳкими ҳамкориҳо дар соҳаи амният ва танзими муҳоҷират ба нақша гирифтанд, иттилоъ медиҳад хабаргузории ТАСС бо истинод ба қарори ҳукумати Русия дар бораи пешниҳоди лоиҳаи созишномаи дахлдор ба президенти Русия.
Мувофиқи ин санад, дар Душанбе намояндагии Вазорати корҳои дохилии Русия боз шуда, дар Маскав намояндагии ВКД ва Вазорати меҳнат, муҳоҷират ва шуғли аҳолии Тоҷикистон таъсис меёбад.
Ба иттилои манбаъ, вазифаҳои асосии сохторҳои нав аз ҳамкорӣ дар мубориза бо ҷинояткории фаромиллӣ, гардиши ғайриқонунии маводи мухаддир, инчунин ҳамкории мутақобила дар соҳаи муҳоҷират иборат хоҳад буд.
Дар намояндагӣ ба арзу муроҷиати шаҳрвандон доир ба масоили салоҳияти худ ва зимни зарурат ҳимоя аз ҳуқуқ ва манфиатҳои онҳо расидагӣ мешавад.
Кормандони намояндагиҳо ва аъзои оилаи онҳо аз имтиёз ва дахолатнопазирии дипломатӣ бархӯрдор хоҳанд буд. Фаъолияти онҳо таҳти роҳбарии умумии сафоратхонаҳои ҳарду кишвар ба роҳ монда мешавад.
Вазири корҳои дохилии Русия Владимир Колоколтсев ин маълумотро тасдиқ намуда, дар шабакаи телевизионии “Первый канал" чунин изҳори назар кардааст:
“Аз ҷониби мо намояндаги ВКД Русия дар Тоҷикистон ва аз тарафи онҳо – намояндагии ВКД-и ин кишвар, илова бар ин, Вазорати меҳнат, муҳоҷират ва шуғли аҳолӣ таъсис дода мешавад”.
Қобили зикр аст, ки Колоколтсев ба ҳайати Русия, ки президенти ин кишвар Владимир Путинро дар ҷараёни сафари давлатии ӯ ба Тоҷикистон ҳамроҳӣ мекунад, шомил аст.
Созишнома пас аз имзои он аз ҷониби президенти Русия ва анҷоми расмиёти дохилиии давлатӣ мавриди амал қарор мегирад.
Дар ҳамин ҳол, ба иттилои Владимир Колоколтсев, шумори ҷиноятҳои содиргардида аз ҷониби шаҳрвандони Тоҷикистон дар Русия 7%, аз ҷумла ҷиноятҳои вазнин ва махсусан вазнин – 2% кам шудааст.
Ба гуфтаи вазири Русия, ҷараёни коҳиш аллакай соли дуюм пайдарпай ба мушоҳида мерасад, ки ба пешгирии ҳадафнок ва кори муштарак бо диаспораҳо марбут аст.
