Кумитаи давлатии амнияти миллии Тоҷикистон (КДАМ) аз боздошти ду “аъзои гурӯҳи нашъаҷаллоб дар шаҳри Турсунзода” хабар дод, ки ба муомилоти 30 кг маводи мухаддири навъи ҳашиш ва афюн гумонбар мебошанд. Саркардаи ин гурӯҳ бо лақаби “Ҳоҷӣ” дар ҷустуҷӯи расмӣ қарор доштааст.
Мақомот дар гузорише, ки Телевизиони “Тоҷикистон”, рӯзи 21-уми январ нашр кард, гуфтаанд, ки Аскар Рӯзиеви 61-сола, ки қаблан 15 сол зиндонӣ шудааст, ҳамроҳи ҷиянаш Маъруфҷон Ҳусайнови 25-сола маводи нашъадорро аз махфигоҳ дастрас кардаанд.
Мақомот нагуфтаанд, ки ин гурӯҳ нияти ба куҷо интиқол додани маводи нашъадорро доштанд, танҳо зикр шудааст, ки ҷиноят моҳи январи соли ҷорӣ ошкор шудааст.
Ин ниҳод гуфтааст, ки гумонбаронро дар ҳудуди ҷамоати деҳоти Навободи шаҳри Турсунзода боздошт ва аз онҳо дар ҳаҷми 30 кг маводи нашъадор дарёфту мусодира кардаанд.
Дар гузориши мақомот, ҳарду гумонбар иттиҳомоти алайҳашон эълоншударо қабул кардаанд. Таҳти чӣ шароит сабт шудани ин иқрор маълум нест.
КДАМ гуфтааст, ки барои муайяну боздошт кардани саркадаи ин гурӯҳ, ки бо лақаби “Ҳоҷӣ” чорабиниҳои тафтишотӣ-ҷустуҷӯӣ идома дорад.
Мақомот мегӯянд, нисбати боздошшудаҳо бо иттиҳоми “тайёрӣ ба ҷиноят” ва “муомилоти ғайриқонунии воситаҳои нашъадор ё моддаҳои психотропӣ…” (моддаи 32, қисми 3 ва моддаи 200, қисми “б”-и, КҶ) парвандаи ҷиноӣ оғоз шудааст.
Дар асоси ин ду банди қонунгузорӣ ба гумонбарон аз 8 то 12 сол зиндон ҷазо таҳдид мекунад. Назари боздоштшудаҳо ва пайвандонашон дар робита ба ин қазия маълум нест.
Бояд гуфт, ки дар як ҳафтаи охир ин дуюмин изҳороти мақомот дар хусуси боздошти аъзоёни гуруҳи нашъаҷаллоб дар кишвар мебошад. Чанд рӯз қабл мақомот аз боздошту ҳукми зиндони ду нафар сокини шаҳри Панҷакент хабар доданд, ки мехостанд 44 кг маводи нашъадорро ба Ӯзбекистон интиқол диҳанд. Бо қарори додгоҳи ин шаҳр онҳо ба муҳлати 19 ва 16 сол равонаи зиндон шуданд.
Тибқи иттилои расмӣ дар даҳ моҳи соли 2025 дар ҳудуди ҷумҳурӣ беш аз 1 тонна воситаҳои гуногуни нашъадор аз муомилот гирифта шуда, чандин гурӯҳи нашъаҷаллоб дастгир шудаанд.
