Дар минтақаи шимоли ҷумҳурӣ ба гумони даст доштан дар қаллобӣ як адвокат боздошт шуд.
Тавре ба ОИ «Азия-Плюс» аз Раёсати Агентии назорати давлатии молиявӣ ва мубориза бо коррупсияи вилояти Суғд хабар доданд, сокини шаҳри Исфара Б.А. ба раёсат муроҷиат намуда, изҳор доштааст, ки узви Ҳайати мушовараи адвокатҳои «Сипар»-и ноҳияи Бобоҷон Ғафуров Шералӣ Ҷӯраев бо роҳи фиреб аз ӯ дар ҳаҷми 5 ҳазор доллари ИМА маблағ гирифта, кам кардани муҳлати ҷазои писарашро, ки барои муомилоти ғайриқонунии маводи мухаддир ба 19 соли зиндон маҳкум шуда буд, ваъда додааст.
«Аммо ба ваъдаи худ вафо накарда, маблағи мазкурро ба эҳтиёҷоти худ масраф намудааст», – гуфтанд дар раёсати мазкур.
Ба иттилои манбаъ, дар суд адвокат аз манфиатҳои писари шахси ба раёсат муроҷиатнамуда ҳимоят мекардааст.
Зимнан зикр гардид, ки Ш.Ҷӯраев боздошт шуда, нисбати ӯ мутобиқи моддаи 247, қ. 4-и КҶ ҶТ (Қаллобӣ ба миқдори ниҳоят зиёд) парвандаи ҷиноӣ боз шудааст ва тафтишот идома дорад.
