Корҳои сохтмонӣ дар нақби «Чормағзак» мувофиқи ҷадвали нақшаи асосӣ амалӣ шуда истодаанд.
Бино ба маълумоти Вазорати нақлиёти Тоҷикистон, дар қисми шимолии вуруди нақб корҳои бетонрезӣ идома ёфта, дар самти ҷануб ба анҷом расидаанд.
«Нақбсозон мунтазири омада расидани беш аз 100 тонна бору ҷиҳози нақб, аз ҷумла ноқилҳои пӯшидаи барқ, трансформаторҳо ва ғайра мебошанд, ки бояд аз корхонаҳои тавлидотии шаҳри Қошқари Чин дастрас шаванд», – иттилоъ медиҳад вазорат.
Ба иттилои манбаъ, бо ворид шудани ин таҷҳизот кори васл кардани онҳо бо суръати дучанд тезонида шуда, кори рангубор дар баъзе ҷойҳо ва қиррезию андоваи сементии дохили нақб то моҳи август идома хоҳад ёфт.
Қобили зикр аст, мавриди истифода қарор гирифтани нақби «Чормағзак» моҳи сентябри соли равон, дар остонаи таҷлили ҷашни Рӯзи истиқлолият ба нақша гирифта шудааст.
Арзиши умумии лоиҳи мазкур тақрибан 70 млн. доллари ИМА-ро ташкил дода, амалисозии он 15-уми марти соли 2010 оғоз гардид. Лоиҳаи сохтмони нақби «Чормағзак» дар доираи лоиҳаи таҷдиди роҳи мошингарди Душанбе-Ваҳдат-Данғара сурат гирифта, паймонкори кулли лоиҳа ширкати чинии China Road аст.
