Президенти Тоҷикистон Эмомалӣ Раҳмон ба президенти Франсия Франсуа Жерар Жорж Олланд дар иртибот ба фаро расидани ҷашни миллии ин кишвар – солгарди ба даст овардани Бастилия барқияи табрикотӣ ирсол намуд.
Бино ба иттилои хадамоти матбуоти сарвари давлат, дар барқияи табрикотӣ зикр мегардад, ки Тоҷикистон Франсияро шарики дерина ва мӯътамади худ дар арсаи байналмилалӣ дониста, дастгириву мусоидати пайвастаи онро дар таҳкими пояҳои соҳибихтиёрии давлати Тоҷикистон баланд арзёбӣ менамояд.
«Боиси қаноатмандист, ки имрӯз робитаҳои байни кишварҳои мо бар асари саъю кӯшишҳои муштараки доимӣ дар арсаҳои ҳамкориҳои мавриди таваҷҷӯҳи тарафайн мазмуну мундариҷаи мушаххасро касб карда, рӯ ба густариши бемайлон ниҳодаанд», – омадааст дар барқияи табрикотии сарвари давлати Тоҷикистон.
Дар барқия Эмомалӣ Раҳмон ба президенти Франсия сиҳату саломатӣ, бахту саодат, пирӯзиҳои нав ба нав ва ба мардуми Франсия сулҳу амонӣ, пешрафти рӯзафзун ва шукуфоӣ таманно кардааст.
