Мақомоти нави раҳбарии Эрон таҳти сарварии раисҷумҳури тозаинтихоби ин кишвар Ҳасани Рӯҳонӣ ният дорад, ки баҳри ҳалли мушкилоти марбут ба барномаи ба истилоҳ ҳастаии Эрон ҳамаҷониба тадбирҳо бинадешад. Чунин изҳор намуд зимни нишасти хабарии рӯзи 17-уми июл вазири корҳои хориҷии Тоҷикистон Ҳамрохон Зарифӣ.
Ӯ имкони то ахири соли равон аз Тоҷикистон боздид намудани мақомоти нави раҳбарии Эрон барои иштирок дар яке аз чорабиниҳои байнулмилалиро аз эҳтимол дур намедонад. Ба андешаи коршиносон, яқинан Рӯҳонӣ дар конфронси байнулмилалии моҳи августи Душанбе оид ба масъалаи ҳамкориҳо дар соҳаи об ширкат хоҳад варзид.
Вазири корҳои хориҷии ҷумҳурӣ зикр кард, ки муддати 8 сол собиқ президенти Эрон Маҳмуди Аҳмадинажод баҳри густариши муносибатҳои дуҷониба бо Тоҷикистон саҳми босазо гузошт.
Дар робита ба масъалаи вазъ дар кишвари ҳамсояи Афғонистон Зарифӣ изҳор кард, ки пас аз хурӯҷи нерӯҳои НАТО аз Афғонистон дар соли 2014, аз сулҳу суботи саросарӣ ё фалокати глобалӣ дар ин кишвар интизорӣ нарафта, вазъ ҳам бакуллӣ дигаргун нахоҳад шуд.
Перомуни муносибатҳои Тоҷикистон бо Ӯзбекистон вазири корҳои хориҷии ҷумҳурӣ чунин изҳори назар кард, ки «мутаассифона, феълан дар бораи пешравиҳое дар ин самт наметавон ҳарфе гуфт».
«Муносибатҳои Тоҷикистон бо ҳамсояи бузург – Чин устуворона дар ҳоли рушд қарор дошта, дар ин самт ҳеҷ мушкилие вуҷуд надорад, аммо ин муносибатҳоро чанде аз ВАО чунон инъикос мекунанд, ки бозори «Корвон»-ро бо молу колои зиёду арзон ва пастсифат ба хотири ман меорад», – таъкид дошт Зарифӣ.
