Имрӯз миёни ҳукумати Тоҷикистон ва Бонки осиёгии рушд Ёддошти ҳусни тафоҳум оид ба лоиҳаи пешниҳодшудаи таҷдиду барқарорсозии нерӯгоҳи барқиву обии «Сарбанд» ба имзо расид. Дар ин бора ба ОИ «Азия-Плюс» аз намояндагии БОР дар Тоҷикистон хабар доданд.
Нерӯгоҳи «Сарбанд» дар дарёи Вахш тахминан дар 80 километрии ҷануби Душанбе воқеъ буда, иқтидораш 240 мегаватт ва нерӯгоҳи барқиву обии куҳантарин баъди нерӯгоҳи Қайроққум ба шумор меравад. Сохтмони нерӯгоҳи «Сарбанд» соли 1956 оғоз гардида, соли 1962 мавриди истифода қарор дода шуд.
Ба гуфтаи сармушовир оид ба энергетикаи Департаменти БОР дар Осиёи Марказӣ ва Ғарбӣ Леван Мчедлишвили, ин лоиҳаи пешниҳодшуда муштаракан аз ҷониби Вазорати энергетика ва саноати ҶТ, ширкати «Барқи тоҷик» ва БОР таҳия гардида, аз лоиҳаҳои бузургмиқёси азнавозии нерӯгоҳҳои барқии Тоҷикистон бо истифода аз технологияҳои муосир маҳсуб меёбад ва чунин таъмиру барқарорсозии комил муҳлати истифодаи нерӯгоҳро боз 50 соли дигар дароз ва хеле фоидаовар хоҳад кард.
Интизорӣ меравад, ки пас аз анҷоми корҳои таъмиру азнавсозӣ иқтидори нерӯгоҳи «Сарбанд» то 252 мегаватт афзуда, дар як сол ба ҳисоби миёна он 1130 гигаватт/соат нерӯи барқ истеҳсол хоҳад кард, ки нисбат ба соли 2012 ба миқдори 38 гигаватт/соат зиёдтар аст.
Гуфта мешавад, БОР ҷудо кардани бурс дар ҳаҷми 116 млн. доллари ИМА барои амалисозии ин лоиҳаро баррасӣ дорад. Дар ҷаласаи Шӯрои мудирони БОР, ки ахири моҳи ноябри соли равон, доир мегардад, баррасии ин пешниҳоди бурсӣ дар назар аст.
Қобили зикр аст, ки Тоҷикистон соли 1998 ба узвияти Бонки осиёгии рушд пазируфта шуд. То имрӯз БОР ба Тоҷикистон дар ҳаҷми зиёда 1 млрд. доллари ИМА қарзҳои имтиёзнок, бурсҳо ва кӯмаки техникӣ ҷудо кардааст.
