15-уми сентябр. ОИ «Азия-Плюс» – Дар пайи амалисозии лоиҳаи «Баргузории чорабиниҳои огоҳкунӣ ва пешгирии нашъамандӣ дар ноҳияҳои наздисарҳадии вилояти Суғд, Вилояти Мухтори Кӯхистони Бадахшон (ВМКБ) ва ноҳияҳои тобеи марказ» гурӯҳи таблиғотии кормандони Агентии назорати маводи нашъаовари назди президенти Тоҷикистон озим Бадахшон гашт.
Як корманди масъули агентӣ Алишер Ташрифов ба ОИ «Азия-Плюс» хабар дод, ки тибқи нақшаи кории лоиҳа, бо сокинони вилоят баргузории чорабиниҳои таблиғотии фаҳмондадиҳӣ ва маърифатии пешгирии нашъамандӣ, ҷалби таваҷҷӯҳ ба мушкилоти қочоқи маводи мухаддир ва ҷинояткории марбут ба маводи мухаддир дар назар аст.
Ба гуфтаи намояндаи агентӣ, тӯли се ҳафта гурӯҳи таблиғотӣ, ки ҳайати он аз мутахассисони агентӣ, табибони бемории нашъамандӣ, арбобони шинохтаи ҷумҳурӣ, намояндагони мақомоти дахлдор ва васоити ахбори омма иборат аст, қариб аз ҳамаи ноҳияҳои ВМКБ боздид намуда, бо мақсади огоҳсозии онҳо аз оқибатҳои ногувори нашъамандӣ ва муайян кардани сатҳи огаҳии онҳо аз ин мушкилот вохӯриву мулоқотҳо доир хоҳанд кард.
