Дар зарфи 8 моҳи соли равон дар вилояти Красноярски Русия ҳудуди 400 нафар тоҷикистониён ба шаҳрвандии ин кишвар пазируфта шуданд.
Бино ба иттилои Раёсати Хадамоти федералии муҳоҷирати Русия дар вилояти Красноярск, дар ин давра 1884 нафар шаҳрвандони хориҷӣ ва афроди бидуни шаҳрвандӣ ба мақоми шаҳрванди Русия дар ин вилоят соҳиб шудаанд. Дар ҳамин давраи соли гузашта шумори чунин нафарон 1363 нафар шаҳрвандони хориҷиро ташкил дода буд.
Ба иттилои манбаъ, шумори қабулшудагон ба шаҳрвандии Русия миёни шаҳрвандони Тоҷикистон – 21%, Қирғизистон – 18%, Қазоқистон – 16% ва Арманистон – 12%-ро ташкил медиҳад. Бинобар сабаби пешниҳоди ҳуҷҷатҳои қалбакӣ ва маълумоти бардурӯғ дар бораи худ аризаи 51 нафар оид ба қабули шаҳрвандии Русия рад карда шудааст.
Зикр мегардад, ки аз оғози сол миёни афроде, ки ба шаҳрвандии Русия дар вилояти Красноярск қабул шудаанд, 793 нафарашон иштирокчиёни Барномаи давлатии мусоидат ба ихтиёран кӯчонидани ҳамватанони муқими кишварҳои хориҷӣ ва оилаҳои онҳо ба Русия мебошанд.
