Зимни мулоқоти имрӯзаи раиси Маҷлиси намояндагони Маҷлиси Олии ҶТ Шукурҷон Зуҳуров бо раиси Думаи давлатии Русия Сергей Наришкин масоили таҳкими робитаҳои байнипарулмонӣ баррасӣ шуда, зимнан зикр гардид, ки сафари Наришкинро дар Тоҷикистон гувоҳи тақвият ва таҳкими устувори рушду муносибатҳои дуҷониба арзёбӣ мекунанд.
Тавре ба ОИ «Азия-Плюс» котиби матбуотии палатаи поёнии парлумони кишвар Муҳаммадато Султонов хабар дод, ҷонибҳо таъкид доштанд, ки дар рушди бемайлони ҳамкориҳои дуҷониба ва ҷараёни амалишавии онҳо муносибатҳои шахсии самимонаву боътимоди сарони кишварҳо Владимир Путин ва Эмомалӣ Раҳмон нақши бузург дорад.
Зикр гардид, ки ҳамчун субъектҳои барбарҳуқуқи муносибатҳои байнулмилалӣ Тоҷикистону Русия дар маҷмӯъ 230 асноди байнидавлатӣ, байниҳукуматӣ ва байниидорӣ ба имзо расонидаанд, ки тамоми паҳлӯҳои муносибатҳоро танзим мекунанд, вале санҷиш нишон додааст, ки аз ин миқдор асноди дуҷониба 12-тоаш то ҳанӯз мавриди амал қарор нагирифта, 28-тоаш машваратҳои иловагиро тақозо мекунанд.
«Дар навбати худ, Сергей Наришкин ба сифати қонуну асноди меъёрӣ-ҳуқуқии дар Тоҷикистон қабулшуда баҳои баланд дода, зикр кард, ки ин гувоҳи сатҳи баланди касбии намояндагони парлумон аст», – афзу М.Султонов.
