Дар ҳошияи баргузории Намоишгоҳ-ярмаркаи байнулмилалии «Тоҷикистон-2013», ки рӯзи шанбеи ҳамин ҳафта дар «Кохи Борбад» ба итмом мерасад, ҳамоиши тиҷоратии соҳибкорони тоҷику эронӣ баргузор шуд.
Бино ба иттилои хадамоти матбуоти Палатаи савдо ва саноати ҶТ (ПСС ҶТ), вохӯрӣ бо дархости соҳибкорони эронӣ, ки ба роҳандозии ҳамкорӣ бо аъзои ПСС ҶТ бо мақсади таъсиси корхонаҳои истеҳсолӣ дар қаламрави Тоҷикистон ҳавасманданд, ташкил гардид.
Дар вохӯрӣ намояндагони ширкатҳои эронии машғул ба истеҳсоли масолеҳи сохтмон, маснӯот аз пластика, маводи бандубасти шаклҳои гуногун, нӯшокиҳои ғайримашруботӣ, равғани растанӣ, маҳсулот барои тифлон ва ҳамчунин таҷҳизот барои ҳамлу нақли бору коло ширкат варзиданд.
Муовини раиси ПСС ҶТ Асаналӣ Карамалиев ба меҳмонон маълумот дод, ки яке аз вазифаҳои Палата мусоидат ба соҳибкорон дар таъсиси корхонаҳои муштарак бо истифода аз ашёи хоми маҳаллӣ, технологияҳои муосир бо истеҳсоли маҳсулоти рақобатпазир ва таъсиси ҷойҳои нави корӣ мебошад.
Сипас Муҳаммад Умронӣ, роҳбари ширкати байнулмилалии намоишгоҳии «Роҳи рушди Осиё»дар бораи ширкатҳои дар вохӯрӣ ва намоишгоҳ ҳузурдошта, аз ҷумла «Ираниан асак семент групп», «Пӯлод Пуиш Ко», «Сино», «Асатаробар Шарқ», «Golghatre Toos», «Гаҷибурии пелостикии модерн», «Yashm Paint Resin», «Нулон Агри Девелопмент» ва ғайра маълумот дода, намояндагони ширкат низ дар бораи фаъолият ва нияти ҳамкорӣ бо Тоҷикистон изҳори назар карданд.
Дар вохӯрӣ аз ҷониби Тоҷикистон намояндагони ширкатҳои «Содирот», ТҒД «Умед», Ассотсиатсияи «Пайки меҳр», МОИ «Панҷ», ҶДММ «Ширин», ҶДММ «Роҳи абрешим», ширкатҳои «Меҳрдод Интернейншл», «Глобал Тоҷиктранс», намояндагии Бонки Латвия дар ҶТ ва ғайра иштирок карданд.
Дар фарҷоми чорабинӣ миёни иштирокчиён гуфтушунидҳои инфиродӣ баргузор шуда, пешниҳодҳо оид ба истеҳсоли сементи сафед, қолинҳои дастӣ, маснӯот аз пластика ва коркарди маҳсулоти кишоварзӣ бештар мавриди таваҷҷуҳ қарор гирифтанд. Меҳмонон ҳамчунин ба таъсиси корхонаҳо дар минтақаҳои озоди иқтисодии Тоҷикистон мароқ зоҳир намуданд.
