Рӯзи 20-уми ноябри соли ҷорӣ Намояндаи доимии Тоҷикистон дар СММ Сироҷидин Аслов зимни нишасти навбатии иҷлоси 68-уми Маҷмаи Умумии СММ, ки ба мавзӯи «Вазъият дар Афғонистон» бахшида шуда буд, аз номи кишварҳои аъзои Созмони ҳамкории Шанхай (СҲШ) суханронӣ намуд.
Бино ба маълумоти Вазорати корҳои хориҷии ҷумҳурӣ, дар суханронӣ Аслов изҳор намуд, ки раванди ноилшавӣ ба сулҳу ваҳдат дар Афғонистон бояд таҳти пешбарии ҳукумату мардуми он кишвар татбиқ шавад.
Қайд карда шуд, ки кишварҳои аъзои СҲШ раванди барқарорсозии Афғонистонро ҳаматарафа дастгирӣ намуда, ба мардуми он кишвар ёрӣ, аз он ҷумла кӯмаки башардӯстонаро расонида истодаанд.
Сафир Аслов таззакур кард, ки СҲШ омодааст дар оянда низ бо мақсади рушди Афғонистон робитаҳои иқтисодӣ ва савдоро байни СҲШ ва Афғонистон вусъат бахшад. Намояндаи доимӣ афзуд, ки татбиқи лоиҳаҳои энергетикӣ, сохтмони роҳҳои оҳан ва автомобилгард ба рушди иқтисод ва таъсиси ҷойхои кории нав дар он кишвар мусоидат мерасонад.
Дар поёни суханронӣ Аслов нақши марказии Намояндагии СММ дар Афғонистонро барои мусоидат ба ин кишвар дар расонидани ёрии зарурӣ ба раванди сулҳу барқарорсозӣ қайд кард.
