Дар Тоҷикистон корхонаи муштараки «Нутристар Тоҷикистон»-и Тоҷикистону Фаронса оид ба истеҳсоли комбикорм (ему хошоки омехта) таъсис дода шуд, ки ахири моҳи январи соли 2014 бо иқтидори пурра ба фаъолият оғоз хоҳад намуд.
Созишнома дар бораи ҷудо кардани 2,2 млн. доллари ИМА аз ҷониби Корпоратсияи байнулмилалии молиявӣ (IFC)-ро чанде қабл дар Душанбе менеҷери минтақавии IFC дар минтақаи Осмиёи Марказӣ Муаззам Меан, директори ширкати фаронсавии Conseils et Competences en Productions Animales (CCPA) Пйер Имофф ва директори генералии «Нутристар Тоҷикистон» Малика Ҷумъаева ба имзо расониданд.
Ба гуфтаи Пйер Имофф, мавқеи ҷуғрофии Тоҷикистон мусоид буда, ин кишвар бештар аз ҳама ба рушди чорводорӣ ниёз дорад. «Истеҳсоли комбикорм дар Тоҷикистон бо мақсади таъмини хоҷагиҳои чорвопарварии маҳаллӣ бо навъҳои гуногуни хӯроки чорвои хушсифат, беҳбуди сифати ғизо ва солимии чорво ва ҳамчунин тақвияти рақобатпазириву хушсифатии маҳсулоти бахши кишоварзии ҷумҳурӣ роҳандозӣ мегардад», – гуфт ӯ.
Директори генералии КМ «Нутристар Тоҷикистон» Малика Ҷумъаева зикр кард, ки иқтидори навбати аввали корхона 36 ҳазор тонна комбикорм дар як солро ташкил дода, муддати 4 соли минбаъда афзоиши чор баробари ҳаҷми истеҳсолот дар назар аст. «Дар муқоиса бо маҳсулоти ба ин монанди хориҷӣ, арзиши маҳсулоти мо нисбатан пасттар шуда, аз рӯи сифат бошад, аз онҳо фарқе нахоҳад дошт», – иброз дошт номбурда.
Менеҷери минтақавии IFC дар минтақаи Осмиёи Марказӣ Муаззам Меан қайд кард, ки дар Тоҷикистон имрӯз бахши чорводорӣ яке аз соҳаҳои бузурги хоҷагидории ҷумҳурӣ ба шумор рафта, рушди он бевосита ба болоравии нархҳо ба маҳсулоти ғизойӣ дар дохили кишвар таъсир мерасонад. «Феълан 64%-и аҳолии Тоҷикистон дар бахши кишоварзӣ машғули кор буда, мо мутмаинем, ки амалисозии лоиҳаи мазкур ба таъмини амнияти ғизоӣ дар ҷумҳурӣ, беҳтар шудани сифати маҳслуот ва рушди фаъолияти хоҷагиҳои деҳқонӣ мусоидат хоҳад кард», – зикр кард ӯ.
