Ҳайдар Одинаев аз вазифаи Директори иҷроияи Филиали Донишгоҳи давлатии Маскав (ДДМ) ба номи М.В. Ломоносов дар Тоҷикистон озод карда шуда, Ректори Донишгоҳи техникии Тоҷикистон ба номи академик Муҳаммад Осимӣ таъин гардид. Собиқ ректори донишгоҳи техникии Тоҷикистон Анвар Абдурасулов ба нафақа гусел карда шуд.
Бино ба иттилои хадамоти матбуоти сарвари давлат, Абдулҳамид Нозимов аз вазифаи мудири шуъбаи илм ва маорифи Дастгоҳи иҷроияи Президенти Ҷумҳурии Тоҷикистон озод карда шуда, Директори иҷроияи Филиали Донишгоҳи давлатии Маскав ба номи М.В. Ломоносов дар Тоҷикистон таъин гардид.
Ҳамчунин бо фармони президент Раҳматулло Мирбобоев аз вазифаи Ректори Донишкадаи молия ва иқтисоди Тоҷикистон озод гардида, Муовини якуми вазири маориф ва илм таъин карда шуд. Ашурбой Солиев Ректори Донишкадаи молия ва иқтисоди Тоҷикистон таъин карда шуд.
Амонулло Салимов, ки то ин вақт Муовини ректори Донишгоҳи кишоварзии Тоҷикистон доир ба таълим буд, Ректори ҳамин донишгоҳ таъин карда шуд.
Раҷабмад Амиров бо сабаби ба кори дигар гузаштан аз вазифаи Ректори Консерваторияи миллии Тоҷикистон озод карда шуд. Фароғат Азизӣ аз вазифаи Муовини вазири фарҳанг озод гардида, Ректори Консерваторияи миллии Тоҷикистон таъин карда шуд.
