Кормандони мақомоти милиса расо пас аз як шабонарӯз ҷинояткори рӯзи 13-уми декабр аз толори суд фироркардаро боздошт намуданд.
Тавре ба ОИ «Азия-Плюс» як манбаъ аз Вазорати корҳои дохилии ҷумҳурӣ иттилоъ дод, рӯзи ҷумъаи ҳафтаи сипаришуда суди ноҳияи Ёвон сокини маҳаллӣ Исфандиёр Акрамови 20-соларо барои дуздӣ ба 8 соли зиндон маҳкум кардааст.
Ба иттилои манбаъ, пас аз қироати ҳукм ба маҳкумшуда муяссар гардидааст, ки бевосита аз толори суд фирор намояд. «ВКД ҷустуҷӯи ҷинояткорро эълон намуда, расо пас аз як шабонарӯз ӯ боздошт ва ба тавқифгоҳи муваққатӣ оварда шуд», – иброз дошт манбаъ.
Зимнан зикр гардид, ки аз рӯйи далели фирори маҳкумшуда аз толори суд корҳои тафтишотӣ ҷараён доранд.
