Узви гурӯҳи ташаббускори таъсиси ҳизби сиёсии «Тоҷикистони нав» Маҳмудҷон Қосимов дар суҳбат бо хабарнигори ОИ «Азия-Плюс» изҳор намуд, ки онҳо ба амалисозии нақшаҳои Зайд Саидов оид ба таъсиси ҳизби сиёсӣ идома мебахшанд.
«Дар яке аз ҷаласаҳои судӣ Зайд Саидов изҳор кард, ки дар куҷое қарор надошта бошад, ба кори худ идома медиҳад ва ин даъват аз мо, аз ҳамфикронаш буд. Ин маънои онро дорад, ки мо кӯшиш ба харҷ хоҳем дод, ки ба таври қонунӣ тибқи ҳуқуқҳои конститутсионии худ ин ҳизбро таъсис диҳем», – гуфт ҳуқуқшинос.
Дар робита ба ҳукми суд М.Қосимов чунин ибрози андеша намуд: «Мисли аксарият ман ҳам дар шигифтам ва ягона чизе, ки гуфта метавонам, ин як худсарӣ аст. Далелҳои кофии айбдории Саидов ҷамъоварӣ нашуда, баръакс далелҳои бегуноҳии ӯ зиёд буданд».
Ба гуфтаи ҳуқуқшинос, мардуми хеле зиёд дар дохил ва хориҷи кишвар бо Зайд Саидов аз наздик шиносанду фаъолият ва ҳосили кори ӯро ба хубӣ медонанд. «Бо вуҷуди хеле сангин будани ҳукми суд, эътимоди мардум нисбати шахсияти Зайд Саидов коста нахоҳад шуд», – афзуд номбурда.
Соҳибкори шинохта Зайд Саидов ба муҳлати
26 соли маҳрумият аз озодӣ
бо мусодираи молу мулк маҳкум шуд. Ӯ дар муассисаи ислоҳии низомаш шадид адои ҷазо карда, то ба марҳилаи иҷро расидани ҳукмаш дар тавқифгоҳи тафтишотии КДАМ нигаҳдорӣ мешавад.
Зайд Саидов аз рӯйи панҷ моддаи Кодекси ҷиноятии ҶТ – 138 (Таҷовуз ба номус), 131 (Ғайриқонунӣ маҳрум кардан аз озодӣ), 170 (Дузанагӣ ё серзанагӣ), 139 (Гирифтани пора) ва 247 (Қаллобӣ) гунаҳкор дониста шудааст.
