Ром Сувайд, муаллифи як мавод дар расонаи хабарии арабии «Elaph» иттилоъ додааст, ки дар даргириҳои низомии Сурия як навраси 9-солаи тоҷик Аҳмад ширкат варзида, ба ҷуз забони модарии худ – тоҷикӣ, забонҳои туркӣ, арабӣ ва русиро низ балад аст.
«Аҳмад барои ҷангиёне, ки аз Чеченистону Туркия ва дигар кишварҳо барои ҷангидан ба Сурия омадаанду забони арабиро намедонанд, ба сифати тарҷумон кор мекунад», – навиштааст муаллифи мақола ва илова намудааст, ки дар вақтҳои холӣ наврас бо ҳамсолони худ ба бозӣ машғул аст.
Ба иттилои муаллифи мавод, дар манотиқи гуногуни Сурия дар урдӯгоҳҳои хурду бузург кӯдакону наврасон ба омӯзиши малакаҳои ҷангӣ машғуланд. Ром Сувайд таъкид месозад, ки айни замон дар сафҳои ошӯбгарон кӯдакон аз Қирғизистон, Тоҷикистон, Ӯзбекистон ва Малайзия ҳузур доранд.
Бино ба маълумоти расонаҳои Сурия, шумори шаҳрвандони Тоҷикистон дар Сурия тақрибан 190 нафар аст. Ахири соли гузашта Суди олии Тоҷикистон се нафар шаҳрванди кишварро барои иштирок дар ҷанги шаҳрвандии Сурия дар сафҳои мухолифин ба 2 соли зиндон маҳкум намуд. Кумита оид ба корҳои дин, танзими анъана ва ҷашну маросимҳои миллии ҷумҳурӣ қаблан изҳор намуда буд, ки тайи солҳои ахир дар низоъҳои Афғонистону Покистон ва Сурия 14 нафар шаҳрванди Тоҷикистон ба ҳалокат расидаанд.
