Рӯзи 4-уми феврали соли равон муовини директори Агентии назорати маводи нашъаовари назди Президенти ҶТ Бунафша Одинаева бо ҷаноби Стивен Фагин – директори шӯъбаи масъалаҳои минтақавии Бюрои Осиёи Марказӣ ва Ҷанубии Департаменти Давлатии ИМА мулоқот анҷом дод.
Бино ба иттилои шуъбаи робита бо ҷомеаи Агентӣ, дар рафти мулоқот масъалаҳои рушди ҳамкориҳои дуҷониба дар соҳаи мубориза бар зидди гардиши ғайриқонунии маводи нашъаовар баррасӣ гардиданд. Инчунин вазъият дар сарҳади Тоҷикистону Афғонистон, ҳамкорӣ бо афсарони алоқаи Вазорати корҳои дохилии Ҷумҳурии Исломии Афғонистон, ки бо афсарони Агентии назорати маводи нашъаовари назди Президенти ҶТ дар масъалаҳои пешгирии қочоқи маводи нашъаовар робитаҳои зич доранд, муҳокима гардиданд.
Гуфта мешавад, инчунин масъалаҳои ҳамкориҳои мақомоти ҳифзи ҳуқуқ ва сохторҳои қудратии Тоҷикистон дар соҳаи мубориза бар зидди муомилоти ғайриқонунии маводи нашъаовар ва дурнамои рушди АНМН мавриди муҳокима қарор гирифтанд. Ҷаноби Фагин ба кӯшишҳои Агентӣ дар самти ҳамоҳанг сохтани фаъолияти сохторҳои қудратии ҷумҳурӣ дар соҳаи мубориза бар зидди муомилоти ғайриқонунии маводи нашъаовар баҳои баланд дод.
