Президенти Ҷумҳурии Тоҷикистон Эмомалӣ Раҳмон бинобар сабаби суқути ҳавопаймо ва ҳалокати 77 нафар бар асари он ба президенти Алҷазоир Абдулазиз Бутефлиқа барқияи тасаллият ирсол намуд.
Бино ба ттилои хадамоти матбуоти сарвари давлат, дар барқияи тасаллияти сарвари давлати Тоҷикистон аз ҷумла зикр мегардад, ки «бо камоли ҳузну андӯҳ хабари садамаи ҳавопаймои боркашони ҳарбиро, ки бар асари он мусофирони зиёди тайёра ҳалок гаштаанд, дарёфт намудам».
«Таъзия ва тасаллияти амиқи хешро ба Шумо, Ҷаноби Олӣ, халқи бародари Алҷазоир ва оилаҳои қурбоншудагон иброз намуда, дуо мекунам, ки Худованд кишвари Шуморо аз ҳар гуна офатҳо эмин нигоҳ дорад», – омадааст дар барқия.
Ёдрас мекунем, ки аввали ҳафтаи равон дар Алҷазоир як ҳавопаймо ба садама дучор гардида, бар асари он 77 нафар шаҳрвандони ин кишвар, ки асосан низомиёну аҳли оилаи онҳо буданд, ба ҳалокат расиданд.
