Чанде қабл нахуствазири ҷумҳурӣ Қоҳир Расулзода ҳамоҳангсози минтақавии Намояндагии Раёсати Комиссариати Олии Созмони Милали Муттаҳид оид ба гурезаҳо дар Осиёи Марказӣ Сабер Азамро ба ҳузур пазируфт.
Тавре ба ОИ «Азия-Плюс» сармушовири хадамоти матбуоти президенти Тоҷикистон Субҳиддин Муҳиддинов хабар дод, дар ҷараёни мулоқот масоили рушди ҳамкориҳои ҳукумати Тоҷикистон бо Раёсати Комиссариати олии СММ дар самти таъмини ҳуқуқҳои гурезагон ва мушкилоти минтақаи Осиёи Марказӣ дар таъмини амнияти онҳо баррасӣ шуданд.
«Сабер Азам ба тадбирҳои андешишидаи ҳукумати Тоҷикистон оид ба қабули гурезагон, таъмини ҳуқуқи онҳо ба кор ва дастрасӣ ба маълумот баҳои баланд дод», – зикр кард Муҳиддинов.
Ба қавли ӯ, Қоҳир Расулзода аз сатҳи ҳамкориҳои ҳукумати ҷумҳурӣ бо Раёсати Комиссариати олии СММ дар самти таъмини ҳуқуқҳои гурезагон изҳори қаноатмандӣ намуда, таъкид дошт, ки айни замон ҳудуди 2 ҳазор нафар мақоми паноҳҷӯянда дар Тоҷикистонро соҳиб шудаанд, ки аксарашон шаҳрвандони Афғонистон мебошанд.
