Душанбе. 26-уми июл. ОИ «Азия-Плюс» – Чанде қабл кормандони Агентии назорати маводи нашъаовари назди президенти Тоҷикистон дар ҳамдастӣ бо Кумитаи ҷавонон, варзиш ва сайёҳии назди ҳукумати ҶТ дар бозорҳои «Саховат», «Ганҷина» ва боғи истироҳати «Дӯстии халқҳо» бо афроди бепарастор ва ноболиғони пойтахт оид ба зарари истеъмоли маводи мухаддир, гирифторӣ ба бемории СПИД ва роҳҳои ҷилавгирӣ аз он сӯҳбатҳои муфид анҷом доданд.
Аз дафтари матбуоти агентии номбурда изҳор доштанд, ки зимни сӯҳбатҳо бо ноболиғон ва волидайни онҳо кормандон доир ба зарари истеъмоли нашъа, гирифторӣ ба бемории СПИД ва дигар амалҳои номатлуб маълумоти дақиқу муфид пешкаш карда, ба ҷавонон талқин намуданд, ки тарзи ҳаёти солимро пеш гиранд.
Дар анҷом ба ҷавонону наврасон дастуру варақаҳо оид ба ин мавзӯъ тақсим карда шуданд.
