Кормандони Шуъбаи ВКД дар ноҳияи Фирдавсии пойтахт ду нафар сокини ноҳияи Шаҳритӯс – Диловар Эшмуродови 20-сола ва Аҳрор Кенҷаеви 32-соларо ба гумони даст доштан дар роҳзанӣ боздошт намуданд.
Бино ба иттилои маркази матбуоти ВКД Тоҷикистон, онҳо шаби 17 ба 18-уми июл дар назди Маркази савдои «Садбарг» ба автомашинаи шахсии тамғаи «Волсваген-голф»-и сокини 22-солаи пойтахт Фирӯз Подшоев, нишаста, ҳангоми ҳаракат ба тарафи бозори «Саховат», дар назди ошхонаи «Осиё», воқеъ дар кӯчаи Н.Қарабоев, бо истифода аз миёнбанди чармӣ ӯро буғӣ мекунанд.
Ба иттилои манбаъ, онҳо ҳамчунин таҳдиди зӯрӣ карда, аз ӯ пули нақд – 480 доллари амрикоӣ, 1-адад телефони мобилии тамғаи «Нокиа», ки арзишаш 500-сомонӣ мебошад ва автомашинаашро гирифта аз ҷойи ҳодиса ғайб задаанд.
Гуфта мешавад, дар натиҷаи бурдани корҳои оперативӣ-ҷустуҷӯӣ бо изи гарм Диловар Эшмуродов ва Аҳрор Кенҷаев фавран дастгир гардида, нисбати онҳо парвандаи ҷиноӣ оғоз гардида, тафтиш идома дорад.
