Кумитаи андози назди ҳукумати Тоҷикистон аз рӯи натиҷаҳои санҷиш қарзи ширкати Babilon-mobile аз пардохти маблағҳои андозро ошкор намуд.
Зимни нишасти хабарии имрӯза раиси Кумитаи андоз Нусратулло Давлатов дар ин робита изҳор намуд, ки бо назардошти ҷарима ва дигар пардохтҳо )аз ҷумла ҷаримаи аҳдшиканӣ ё пеня) қарзи умумии Babilon-mobile аз андоз 341 млн. сомониро ташкил дода, ин маблағи ошкоршуда баҳсӣ аст, зеро ширкат қарзро эътироф накарда, аз пардохти он саркашӣ дорад.
«Қарзи асосӣ дар давраи аз соли 2011 ба вуҷуд омадааст. Зимни санҷиш ошкор шуд, ки ширкат меъёрҳои қонунгузории зиддиинҳисориро риоя накарда, ҳангоми хизматгузорӣ ба мизоҷон аз тарифҳое, ки бо Агентии зиддиинҳисории кишвар мувофиқа нашуда буданд, истифода кардааст. Ҳаммаи ширкатҳои пешрафта дар бозор тарифҳоро бояд бо Агентии зиддиинҳисорӣ мувофиқа намоянд. Ширкат дидаву дониста мизони даромадро аз будаш пасттар нишон додааст», – гуфт ӯ.
Давлатов зикр кард, ки ширкати Babilon-mobile бо маблағи қарзи ошкоршуда мувофиқ набуда, тасмим гирифтааст, ки ба суд муроҷиат кунад ва ояндаи наздик муроҷиати онҳо баррасӣ мешавад.
«Мо ба мавқеи ягона расида натавонистем ва онҳо пардохти маблағи қарзро рад намуданд. Мо ба вохӯрӣ дар суд бо онҳо омодаем. Ба иҷрои ҳама гуна қарори суд мо уҳдадорем. Шояд суд қарор мекунад, ки ҳаҷми қарз коҳиш дода шавад ва шояд ба чунин хулоса наояд», – зикр кард раиси Кумитаи андоз.
