– Муҳаққиқи ҷавони тоҷик Александр Содиқов, ки санаи 22-юми июл бо шарти тарк накардани маҳалли зист аз тавқифгоҳи муваққатӣ (СИЗО)-и КДАМ Тоҷикистон озод карда шуд, то ҳанӯз шахсе боқӣ мемонад, ки рӯ ба рӯ бо хавфи ба ҳабс гирифтан қарор дорад, – изҳор мекунад созмони байнулмилалии ҳомии ҳуқуқи Amnesty International (Афви Байнулмилал).
Дар изҳороти пахшшудаи созмон дар ин робита зикр мегардад, ки баъди озодӣ аз тавқифгоҳ Александр Содиқов дар мусоҳиба гуфтааст, ки мавриди кирдори бераҳмона қарор нагирифта, айбномаҳо нисбати ӯ бекор нашудаанд ва тафтиш то ҳол идома дорад.
«Мутобиқи моддаи 305-и Кодекси ҷиноии ҶТ, ки бар асоси он ӯ ба «хиёнат ба давлат» гумонбар дониста мешавад, ӯ метавонад ба муҳлати аз 12 то 20 сол аз озодӣ маҳрум гардад. Дар ин робита Amnesty International бар ин назар аст, ки Александр Содиқов танҳо барои амалисозии ҳуқуқи худ ба озодии баён боздошт шудааст, зеро ӯ қонунӣ рӯйи таҳқиқоти илмии худ кор мекард, ки минбаъд бояд барои огаҳии ҷомеа интишор мегардид», – омадааст дар изҳороти созмон.
Бо ишора ба рӯзи боздошти Содиқов дар шаҳри Хоруғ, Amnesty International хотиррасон мекунад, ки дарҳол баъди тариқи телевизиони ВМКБ нишон додани Содиқов шоми рӯзи 18-уми июн, аллакай рӯзи дигар раиси КДАМ Тоҷикистон Саймӯмин Ятимов изҳор намуд, ки ҷосусони хориҷии дар Тоҷикистон фаъолиятдошта ба халалдор намудани амният дар кишвар кӯшиш доранд.
Бино ба маълумоти Amnesty International, афроди дар Тоҷикистон аз ҷониби кормандони КДАМ боздоштшуда, мавриди хавфи поймолкунии ҳуқуқи инсон бо шумули шиканҷаву дигар кирдорҳои бераҳмона қарор мегиранд. «Ба ҷуз ин, аксар вақт дастрасии боздоштшудагон ба адвокатҳо рад мешавад», – қайд мешавад дар изҳорот.
