Вазорати корҳои дохилӣ ва Вазорати мудофиаи Тоҷикистон маълумоти чанде қабл интишоргардида дар ВАО-и хориҷӣ дар бораи оғози хурӯҷи воҳидҳои пурзӯршудаи милиса ва артиш аз маркази маъмурии ВМКБ – шаҳри Хоруғро рад карданд.
Сардори маркази матбуоти Вазорати мудофиаи ҶТ Фаридун Маҳмадалиев ба «Азия-Плюс» дар ин робита изҳор намуд, ки баъде чанде аз бетартибиҳои моҳи май дар Хоруғ, ки бар асари он се нафар сокинони маҳаллӣ ва як корманди милиса ба ҳалокат расида буданд, ба маркази маъмурии ВМКБ нерӯ ва воситаҳои иловагии вазорат сафарбар нашуда буданд. «Барои ба Хоруғ сафарбар намудани нерӯ ва воситаҳои иловагӣ ҳеҷ зарурате набуд ва нест», – иброз дошт ӯ.
Сардори маркази матбуоти Вазорати корҳои дохилии Тоҷикистон Ҷалолиддин Садриддинов низ сафарбарии воҳидҳои иловагии мақомоти милиса ба шаҳри Хоруғ дар моҳи майро рад кард. Ҳарду ҳам зикр карданд, ки чун нерӯ ва воситахои иловагӣ сафарбар нашуда буданд, пас барои хориҷ кардан ҳам чизе нест.
Дар робита ба маълумоти нашршуда оид ба аз ҷониби ҳукуматдорони шаҳри Хоруғ ба низомиён манъ кардани ҳузур доштан дар ҷойҳои ҷамъиятӣ бо сарулибос ва лавозимоти ҳарбӣ, Ф.Маҳмадалиев ва Ҷ.Садриддинов таъкид намуданд, ки бо фармони президенти ҷумҳурӣ ҳанӯз аз соли 1999 ба кормандони сохторҳои қудратӣ ҳузур доштан дар ҷойҳои ҷамъиятӣ бо сарулибос ва лавозимоти ҳарбӣ манъ шудааст.
«Ғайр аз ин, бо фармони вазири мудофиаи кишвар тартиби дар бар доштани сарулибоси ҳарбӣ муқаррар шудааст, ки мутобиқи он хизматчии ҳарбӣ ба ҳузур доштан дар ҷойҳои ҷамъиятӣ бо сарулибос ва лавозимоти ҳарбӣ ҳуқуқ надорад», – таъкид кард сардори маркази матбуоти Вазорати мудофиа.
Дар мавриди мълумоти интишоргардида бобати муташанниҷ шудани вазъ дар Хоруғ баъди қатли ду сокини маҳаллӣ шаби рӯзи сешанбеи ҳамин ҳафта, Ҷ.Садриддинов зикр кард, ки вазъ дар шаҳри Хоруғ орому амн буда, сокинони маҳаллӣ ба тафтиши парвандаи ҷиноии аз рӯи ин ҳодиса бозшуда мусоидат мекунанд.
«Гурӯҳи фаврии тафтишотӣ, ки шахсан аз ҷониби вазири корҳои дохилӣ барои тафтиши ин ҷиноят ба Хоруғ сафарбар шуд, дар шаҳр машғули таҳқиқи ҳодиса мебошанд», – иброз дошт сардори маркази мтабуоти ВКД ҶТ.
Ёдрас мекунем, ки вазири корҳои дохилии ҷумҳурӣ генерал-лейтенанти милиса Рамазон Раҳимзода ҷараёни тафтиши
қатли ду сокини шаҳри Хоруғ
Сайёд Охонқадамов ва Далер Хушдиловро шахсан зери назорат гирифт.
Ҷасадҳои онҳо бо ҷароҳатҳо аз тири силоҳи оташфишон дар мавзеи Наводаки наздик ба шаҳри Хоруғ дар дохили автомашинаи сиёҳшишаи тамғаи «Мерседес бенс-600» дарёфт шуда буданд.
