Соли равон Тоҷикистон тақрибан ба андозаи ҳудуди 40% содироти алюминий ба хориҷи кишварро коҳиш дод, ки яке аз маҳсулоти асосии содиротии ҷумҳурӣ маҳсуб меёбад.
Бино ба маъмлумоти вазорату идораҳои дахлдори бахши иқтисоди кишвар, давоми моҳҳои январ-сентябри соли 2014 ҳаҷми содироти алюминий ба хориҷи кишвар дар муқоиса бо ҳамин давраи соли гузашта аз рӯи ҳаҷм 39,7% ва аз рӯи арзиш 41,7% камтар шудааст.
Дар 9 моҳи соли равон аз Тоҷикистон ба хориҷи кишвар ба маблағи умумии 173,1 млн. доллари ИМА 94,4 ҳазор тонна алюминий содирот шудааст. Дар ҳамин давраи соли гузашта ҳаҷми содироти алюминий ба хориҷи кишвар 156,5 ҳазор тонна ба маблағи умумии 293,6 млн. доллари ИМА-ро ташкил дода буд.
Дар ҳамин ҳол, моҳи сентябри соли равон ҳаҷми содироти алюминий аз Тоҷикистон ба 10,2 ҳазор тонна ба маблағи умумии 20,1 млн. доллари ИМА баробар шуд.
Алюминии Тоҷикистон асосан ба Туркия ва дар ҳаҷми начандон зиёд ба Русия ва Чин содирот карда мешавад.
Бино ба маълумоти пешакии Вазорати рушди иқтисод ва савдои Тоҷикистон, соли равон истеҳсоли алюминии аввалия дар Тоҷикистон коҳиш ёфта, камтар аз 150 ҳазор тоннаро ташкил хоҳад дод.
Соли 2013 низ ҳаҷми истеҳсоли алюминии аввалия дар Ширкати алюминии Тоҷикистон (ТАЛКО) дар муқоиса бо соли 2012 аз рӯи ҳаҷм 25% ва аз рӯи арзиш 30% коҳиш ёфта, 200 ҳазор тонна ба маблағи умуии 370 млн. доллари ИМА-ро ташкил дод, ки 197 ҳазор тоннааш ба хориҷи кишвар содирот шуд.
