Дар зарфи 10 моҳи соли ҷорӣ ҳаҷми воридоти орд ба Тоҷикистон тақрибан 19% коҳиш ёфта, ҳамзамон ҳаҷми воридоти гандум ба ҷумҳурӣ беш аз 20% афзуд.
Бино ба маълумоти Агентии омори назди президенти ҶТ, давоми моҳҳои январ-октябри соли равон ба Тоҷикистон ба маблағи умумии ҳудуди 60 млн. доллари ИМА наздики 145 ҳазор тонна орд ворид шудааст. Дар ҳамин давраи соли гузашта аз хориҷи кишвар ба ҷумҳурӣ ба маблағи умумии наздики 64 млн. доллари ИМА 148 ҳазор тонна орд ворид гардида буд.
Тибқи маълумоти Агентии омор, дар ин давра ба Тоҷикистон ба маблағи умумии 180 млн. доллари ИМА қариб 605 ҳазор тонна гандум ворид карда шудааст. Дар ҳамин давраи соли гузашта аз хориҷи кишвар ба ҷумҳурӣ ба маблағи умумии ҳудуди 167 млн. доллари ИМА 501 ҳазор тонна гандум ворид гардида буд.
Дар ҳамин ҳол, моҳи октябри соли равон ба Тоҷикистон тақрибан 20 ҳазор тонна орд ва 105 ҳазор тонна гандум ворид карда шудааст.
Қобили зикр аст, ки воридоти орду гандум ба Тоҷикистон қариб пурра Қазоқистон сурат гирифта, дар ҳаҷми начандон зиёд аз Русия низ ворид карда мешавад.
