Абдуҷаббор Раҳмонов, ректори Донишгоҳи давлатии омӯзгории Тоҷикистон тасмим гирифтааст, ки барои донишҷӯёне, ки ба дарсҳо ҳозир намешаванд, ҷаримаи пулӣ ҷорӣ созад.
Абдуҷаббор Раҳмонов ба «Азия-Плюс» дар ин робита изҳор намуд, ки ҳайати омӯзгорони донишгоҳ қарор кардааст, ки барои ба машғулиятҳо ҳозир нашудан, донишҷӯён бояд ҷаримаи пулӣ баста шаванд. Ҳозир нашудан ба як машғулият барои донишҷӯ метавонад 25 сомонӣ арзиш дошта бошад.
Ректори донишгоҳ зикр кард, ки алҳол ин пешниҳод мавриди омӯзиш ва баррасии Вазорати маориф ва илми ҷумҳурӣ қарор дорад.
А.Раҳмонов мегӯяд, ҳангоми дар Белорус қарор доштанаш сари ин андеша омадааст, зеро дар он ҷо барои як рӯз ба дарсҳо ҳозир нашудан донишҷӯ 50 доллари амрикоӣ маблағ месупорад ва аз ин рӯ, дар он ҷо донишҷӯёни дарсгурез қариб ба мушоҳида намерасанд.
«Он ҷо донишҷӯён дар ҳаросанд, ки агар ду рӯз ба дарс наоянд, аллакай на 50 , балки маҷбуранд 150 доллари ИМА ҷарима супоранд. Фикр мекунам, ки ин варианти хуби боздории донишҷӯёни мо аз иштирок дар муноқишаҳо ва садамаҳои нақлиёт аст. Ғайр аз ин, ба мо барои посбон гузоштан назди дарвозаи донишгоҳ, ки донишҷӯёни дарсгурезро ба баромадан аз қаламрави донишгоҳ иҷозат намедоданд, дигар зарурате намемонад», – иброз дошт роҳбари донишгоҳ.
