Рӯзи 25-уми ноябр дар Вазорати рушди иқтисод ва савдои Тоҷикистон вохӯрии муовини аввали вазир Неъматҷон Бӯриев бо мутахассиси департаменти Осиёи Марказӣ ва Ғарбии Бонки осиёии рушд (БОР) хонум Приянка Суд баргузор гардид.
Бино ба иттилои хадамоти матбуоти Вазорати мазкур, дар ҷараёни вохӯрӣ масъалаҳои мухталифи ҳамкориҳои самарабахш миёни Тоҷикистон ва БОР, ҳамчунин, мулоҳизаҳо оид ба фаъолияти Маркази татбиқи лоиҳаҳои шарикии давлат ва бахши хусусӣ, фаъол намудани ҳамкории Марказ бо вазорату идораҳои соҳавӣ, имконияти татбиқи якчанд лоиҳаҳои сармоягузорӣ, аз ҷумла лоиҳаҳо вобаста ба минтақаҳои озоди иқтисодӣ ва ғайра мавриди баррасӣ қарор гирифтанд.
Дар ҳамин ҳол, як рӯз қабл муовини вазири рушди иқтисод ва савдои ҶТ Гулрӯ Қаюмова бо ҳайати намояндагони БОР хонум Тамара Ковзиридзе ва Фаррух Султонов мулоқот анчом дода, дар вохӯрии мазкур масоили рушди саноатии кишвар, инкишофи минбаъдаи бахши саноатӣ ва нақши он дар диверсификатсияи рушд, робитаи он ба коркард, содирот ва шуғл, ҳамчунин имконият ва масъалаҳои ҷойдошта баррасӣ шуданд.
Гуфта мешавад, дар анҷоми мулоқотҳои суратгирифта ҷонибҳо ҷиҳати минбаъд густариш додани ҳамкориҳои дуҷониба миёни Вазорати рушди иқтисод ва савдо ва Бонки осиёии рушд омодагии худро баён доштанд.
