Душанбе. 26-уми июни с.2008. ОИ «Азия-Плюс»
– Кормандони Агентии назорати давлатии моливӣ ва мубориза бо коррупсияи ҶТ раиси комиссияи танзими расму оинҳои шаҳри Турсунзода Аҳтам Қосимовро ба маҳбас кашиданд.
Аз дафтари матбуоти агентӣ хабар доданд, ки раис ба ҷурми якчанд ҳодисаҳои гирифтани пора гумонбар дониста мешавад. «Аз ҷумла, ӯ барои саривақт ба қайд нагирифтани никоҳ дар мақомоти давлатии қайди ҳолатҳои шаҳрвандӣ бо роҳи тамаъҷӯӣ аз навхонадорон 200 доллари амрикоӣ гирифтааст, аз навхонадорони дигар барои гузаронидани маъракаи тӯй 190 сомонӣ талаб кардааст ва барои гузаронидани ҷашни зодрӯз аз соҳиби он 200 сомонӣ тамаъ кардааст», – изҳор дошт манбаъ.
Нибат ба аъмоли А.Қосимов тибқи моддаи 319, банди 2-и Кодекси ҷиноии ҶТ (Пора гирифтан) парвандаи ҷиноӣ оғоз шудааст ва мувофиқи он ба ӯ ҳафт соли маҳрумият аз озодӣ пешбинӣ гардидааст.
