Имрӯз таҳти раёсати раиси шаҳри Душанбе Маҳмадсаид Убайдуллоев машвари кории мақомоти шаҳрдорӣ баргузор шуд, ки дар он дар баробари мушкилоти хоҷагидории пойтахт, ҳамчунин ҷараёни амалисозии барномаҳои иқтисодиву иҷтимоӣ, рафти иҷрои нақшаи ҷамъоварии андоз ва масъалаҳои натиҷагирӣ аз фаъолият дар соли ҷорӣ ва омодагиҳо ба пешвози Соли нави мелодӣ мавриди баррасӣ қарор гирифтанд.
Котиби матбуотии раиси пойтахт Шавкат Саидов ба «Азия-Плюс» дар ин робита иттилоъ дод, ки М.Убайдуллоев ба Раёсати андози шаҳрдорӣ дастур додааст, ки дар ҳамдастӣ бо Раёсати молия ва раиси ноҳияҳои пойтахт ҷиҳати иҷрои нақшаи ҷамъоварии тамоми намуди андозҳо тадбирҳои таъҷилӣ андешанд.
Бино ба гуфти манбаъ, раиси пойтахт ҳамчунин ба хадамоти дахлдори шаҳрдорӣ супориш додааст, ки ҷиҳати бартараф кардани пардохти қарз аз музди меҳнат, пеш аз ҳама дар сохторҳои ширкати «Барқи тоҷик» чораҳои таъхирнопазир руйи кор гиранд.
Зимнан зикр гардид, ки ба мақомоти прокуратураи пойтахт дастур дода шудааст, ки оид ба омодагии биноҳои шаҳр ҷиҳати интиқоли оби гарм ба низоми гармидиҳӣ санҷиши ҳамаҷониба барпо кунанд.
