Раёсати тафтишоти Агентии назорати давлатии молиявӣ ва мубориза бо коррупсияи Тоҷикистон тафтиши парвнадаи нав нисбати соҳибкори маҳкумшуда Зайд Саидовро ба итмом расонида, Прокуратураи генералии ҷумҳурӣ рӯзи 16-уми январ онро ҷиҳати баррасӣ ба Суди олии ҶТ ирсол намуд.
Бино ба маълумоти маркази матбуоти Агентии зиддифасод, дар ин парванда Зайд Саидов дар содир намудани ҷиноятҳо мутобиқи моддаҳои 314 (Суистифода аз ваколатҳои мансабӣ), 245 (Азонихудкунӣ ё исрофкорӣ), 262 (Ба миқдори калон қонунӣ гардонидани маблағҳои пулӣ ва дигар молу мулки ғайриқонунӣ бадастовардашуда) ва 292 (Ба миқдори махсусан калон саркашӣ намудан аз супоридани андозҳо ва пардохтҳо аз шахси ҳуқуқӣ)-и Кодекси ҷиноии ҶТ гумонбар дониста мешавад.
«Аз рӯи айбҳои эълонкардашуда зарари молиявии ба буҷаи давлат расонидашуда, 52 млн. 254 ҳазор сомониро ташкил дода, дар рафти пешбурди парвандаи ҷиноятӣ, барои таъмини даъвои гражданӣ ё эҳтимоли мусодираи молу мулк, бо қарори суд ба молу мулки айбдоршаванда Саидов З.Ш. ба маблағи умумии зиёда аз 30 млн. сомонӣ сомонӣ ҳабс гузошта шудааст», – гуфта мешавад дар маълумоти Агентии зиддифасод.
