Дар минтақаи шимоли ҷумҳурӣ таҳиягари лотереяҳои қалбакӣ (сохта)-и «Лото-Спорт» боздошт шуд.
Роҳбари маркази матбуоти Раёсати ВКД Тоҷикистон дар вилояти Суғд Акбар Шарипов ба «Азия-Плюс» дар ин робита иттилоъ дод, ки чанде қабл раҳбарияти ширкати «Лото-Спорт» ба шуъбаи корҳои дохилии шаҳри Хуҷанд бо ариза муроҷмат намудаанд, ки дар муомилот лотереяҳои сохтаи ин ширкат пайдо шудаанд.
«Дар ҷараёни баргузории чорабиниҳои фаврӣ-ҷустуҷӯйӣ ба гумони даст доштан дар ин амал сокини 43-солаи шаҳри Исфара А.С. боздошт шуда, ҳангоми кофтукови шахсӣ аз ӯ 47 дона лотереяҳои сохтаи «Лото-Спорт» дарёфт ва мусодира шуд», – иброз дошт ӯ.
Ба гуфтаи Шарипов, ташхис нишон додааст, ки ин лотереяҳо бо истифода аз техникаи компютерӣ таҳия карда шудаанд. «Аз рӯи ин далел ҷиҳати оғози парвандаи ҷиноӣ мутобиқи моддаи 340 КҶ ҶТ (Сохтакорӣ, тайёр кардан ё ба соҳибияти каси дигар додани ҳуҷҷат, мукофоти давлатӣ, штамп, муҳр ва бланкаҳои қалбакӣ) тадбирҳо рӯйи кор гирифта мешаванд», – афзуд номбурда.
