Дар вилояти Суғд як зан ба азхудкунии беш аз 1 млн. доллари ИМА бо роҳи қаллобӣ гумонбар дониста мешавад.
Аз маркази матбуоти Раёсати ВКД Тоҷикистон дар вилояти Суғд ба «Азия-Плюс» дар ин робита иттилоъ доданд, ки бар асоси аризаи даҳҳо нафар сокинони ноҳияи Зафаробод нисбати сокини ҳамин ноҳия В.М. мутобиқи моддаи 247, қ. 4 (Қаллобӣ дар ҳаҷми ниҳоят зиёд)-и Кодекси ҷиноии ҶТ парвандаи ҷиноӣ боз шудааст.
Бино ба иттилои манбаъ, ин зан аз онҳо бо роҳи фиреб маблағҳои пулӣ гирифта, ваъда додааст, ки онро бо фоизҳои зиёд бармегардонад. «Ба сурати умум ӯ дар ҳаҷми беш аз 1 млн. доллари ИМА маблағ гирифта, онро барои эҳтиёҷоти шахсиаш харҷ кардааст», – гуфт манбаъ.
Зимнан зикр гардид, ки айни замон аз рӯи ин далел тафтишот идома дорад.
