Хешону наздикони корманди раёсати истифодабарии роҳҳои ноҳияи Синои пойтахт Зевармо Пирова, ки рӯзи 28 сентябри соли 2014 бар асари зери чархи автомашинаи ёвари прокурори ноҳияи Исмоили Сомонии пойтахт Фирӯз Холиқзода мондан ҳалок шуда буд, имрӯз даъвои худ нисбати гунаҳкори садама барои ҷуброни зиёни моддӣ ва маънавӣ дар ҳаҷми 300 ҳазор сомониро бозхонданд.
Мирзо Муродов, ҳамсари Зевармо Пироваи марҳум ба «Азия-Плюс» дар ин робита иттилоъ дод, ки суди ноҳияи Шоҳмансури пойтахт имрӯз мебоист қарори худ дар бораи даъвои онҳоро эълон кунад, вале ӯ аз даъво даст кашидааст. «Ҳаволаи ӯро ба Худо месупорам», – иброз дошт Муродов.
Қобили зикр аст, ки аз аввали моҳи май суди ноҳияи Шоҳмансури пойтахт ба барррасии даъвои хешону наздикони Зевармо Пирова аз болои Фирӯз Холиқзода оид ба талаби ҷуброни зарари моддиву маънавӣ ба ҷабрдидагон ба маблағи 300 ҳазор сомонӣ оғоз намуд.
Ёдрас мекунем, ки санаи 28-уми сентябри соли равон дар назди меҳмонхонаи «Ҳаят Реҷенсӣ» корманди раёсати истифодабарии роҳҳои ноҳияи Синои пойтахт Зевармо Пироваи 54-сола
бар асари зери чархи автомашинаи
ёвари прокурори ноҳияи Исмоили Сомонии пойтахт Фирӯз Холиқзода мондан ба ҳалокат расид.
Аз рӯи далели рух додани садамаи нақлиёт ва аз ҷойи ҳодиса ғайб задан прокуратураи пойтахт парвандаи ҷиноӣ боз карда, тафтишоти онро Прокуратураи генералии ҷумҳурӣ ба зимма гирифт.
Гунаҳкори садамаи нақлиёт Фирӯз Холиқзодаи 31-сола ба ҳайси ёвари прокурори ноҳияи Исмоили Сомонии пойтахт фаъолият дошт. Ӯ писари собиқ декани факултаи ҳуқуқшиносии Донишгоҳи миллии Тоҷикистон, профессор Кароматулло Холиқов мебошад, ки се сол қабл аз олам даргузашт.
Санаи 29 ноябри соли 2014 Фирӯз Холиқзода мавриди афв қарор гирифта, аз тавқифгоҳи муваққатӣ озод карда шуд. Суди ноҳияи Сино қарор кард, ки парвандаи ҷиноӣ нисбати Ф.Холиқзода мутобиқи моддаи 212и КҶ ҶТ (Вайрон кардани қоидаҳои ҳаракатӣ роҳ ва истифодаи воситаҳои нақлиёт) қатъ ва айбдоршаванда афв карда шавад, вале наздикони зани ҳалокшуда бо ин қарори суди ноҳияи Сино розӣ набуданд. Шавҳари зани ҳалокшуда
ҷиҳати бозбинии қарори мазкур
ба суди шаҳри Душанбе даъво бурд.
Ҳамчунин мебояд гуфт, ки Фирӯз Холиқзода ба кор дар мақомоти прокуратура барқарор намешавад, зеро дар афви эълоншуда ин пешбинӣ нашудааст.
