Суди ноҳияи Исмоили Сомонии пойтахт собиқ мушовири дастгоҳи ёвари президенти Тоҷикистон оид ба сиёсати кадрӣ Ҳасан Раҷабовро ба 5 соли зиндон маҳкум кард.
Бино ба маълумоти
Радиои Озодӣ
, ҳукм ахири ҳафтаи гузашта содир шуда, мурофиа пушти дарҳои пӯшида сурат гирифтааст. Ба тафтиши парванда бо иттиҳоми коррупсия ва порагирӣ Кумитаи давлатии амнияти миллӣ машғул будааст.
Собиқ мушовири дастгоҳи ёвари президенти Тоҷикистон оид ба сиёсати кадрӣ Ҳасан Раҷабов аввали моҳи июн аз ҷониби кормандони КДАМ ба гумони ришваситонӣ ба ҳабс гирифта шуд. Ӯ дар содир амудани ҷиноят мутобиқи моддаи 319-и Кодекси ҷиноии ҶТ (Аз ҷониби шахси мансабдор шахсан ё ба воситаи миёнарав гирифтани пора дар намуди пул, коғазҳои қимматнок, молу мулк ё фоидаи дорои характери молу мулкӣ дошта, барои иҷро кардан ё накардани амали муайян ба манфиати порадиҳанда ё намояндагони ӯ, агар чунин ҳаракат (беҳаракатӣ) ба доираи ваколати хизматии шахси мансабдор) айбдор карда мешавад.
Як манбаъи Озодӣ аз мақомоти судӣ хабар додааст, ки ҳукми додгоҳ содир шуд, вале ҳанӯз мавриди иҷро қарор нагирифтааст ва вакилони маҳкумшуда ба бозбинӣ шудани парванда бовар доранд.
Парванда ахири моҳи июл ба Додгоҳи ноҳияи Исмоили Сомонӣ ирсол гаштааст. Вале то ҳанӯз додгоҳи Исмоили Сомонӣ ба таври расмӣ аз ҳукми худ дар мавриди Ҳасан Раҷабов иттилоъ надодааст. Масъулони додгоҳ хабари баргузории мурофиаро на тасдиқ карданд ва на рад.
Ба вазифаи мушовири дастгоҳи ёвари президенти Тоҷикистон оид ба сиёсати кадрӣ Ҳасан Раҷабов 21 феврали соли 2014 таъин шуда буд.
