Ҳизби халқии демократии Тоҷикистон ва ҳизби «Единая Россия» (Русияи воҳид)-и Русия ба наздикӣ шартномаи ҳамкорӣ ба имзо мерасонанд.
Сухангӯи ҲХДТ Усмон Солеҳ ба «Азия-Плюс» дар ин робита иттилоъ дод, ки лоиҳаи созишнома миёни ҷонибҳо мувофиқа шуда, «танҳо муайян кардани санаи имзои он боқӣ мондааст».
Дар лоиҳаи созишномаи мазкур роҳандозии ҳамкориҳо миёни ҷонибҳо дар бахшҳои табодули таҷриба, иттилоот, ҳайатҳо ва омодакунии кадрҳо пешбинӣ шудааст.
Ҳизби халқии демократии Тоҷикистон 10-уми декабри соли 1994 таъсис ёфта, айни замон шумори аъзои он ҳудуди 250 ҳазор нафарро ташкил медиҳад. Раиси ҳизб президенти Тоҷикистон Эмомалӣ Раҳмон аст. Аксари аъзои ҳукумат, вакилони палатаи поёнии парлумон ва маҷлисҳои маҳаллии вакилони халқи вилоят ва шаҳру навоҳии ҷумҳурӣ аъзои ҲХДТ мебошанд.
Ҳизби сиёсии умумирусиягии «Единая Россия» бузургтарин ҳизб дар Русия ба шумор рафта, раиси ҳозираи он нахутсвазири кунунии ин кишвар Дмитрий Медвелев аст. Шумори аъзои ҳизби «Единая Россия» беш аз 2,5 млн. нафарро ташкил медиҳад.
Қобили зикр аст, ки чанде қабл Исфандиёр Абдураҳмонов собиқ пешвои бахши ҷавонони ҲХДТ – Ташкилоти ҷамъиятии ҷавонони «Созандагони Ватан»
ба сафҳои ҳизби «Единая Россия» пайваст.
