Бо қарори суди иқтисодии Тоҷикистон бар асоси пешниҳоду тавсияи Прокуратураи генералии кишвар рӯзи 24 август дафтари кории марказии Ҳизби наҳзати исломии Тоҷикистон, воқеъ дар кӯчаи Борбади пойтахт муҳр зада шуд.
Бино ба маълумоти сомонаи расмии ҲНИТ, Прокуратураи генералии кишвар ин қарори худро бо он маънидод кардааст, ки баҳси қонунӣ будани харидорӣ шудани ин бино ҳаллу фасл нашудааст.
Кумитаи давлатии идораи амволи давлатӣ дар ин робита изҳор доштааст, ки дар вақташ ин бино, ки дар он дафтари кории ҲНИТ воқеъ аст, ғайриқонунӣ харида шудааст. Қаблан ин бино ба ширкати «Тиҷорат» тааллуқ дошта, ҲНИТ онро аз ҳамин ширкат харидааст.
Суд-иҷрочиҳои Суди иқтисодӣ, ки дарҳои дафтари кории ҲНИТ-ро муҳр задаанд, изҳор намудаанд, ки баҳси мазкур бояд дар муддати 10 рӯз ҳаллу фасл шавад.
Дар ин бино ҲНИТ рӯзи 15 сентябр анҷумани навбатии ҳисоботиву интихоботии худро баргузор карданӣ буд, ки дар кори он иштироки беш аз 500 нафар вакилону меҳмонон дар назар аст. ҲНИТ бар ин назар аст, ки ин амали ҳукуматдорон ба монеъа эҷод кардан барои баргузории анҷуман равона шудааст.
