Рӯзи 27 августи соли 2015 маросими ба тасвиб расидани созишномаҳои муштараки 2 лоиҳаи навин дар Сафорати Ҷопон дар Душанбе баргузор гардид. Созишномаҳои мазкур аз ҷониби Такаши Камада, Сафири Ҷопон дар Ҷумҳурии Тоҷикистон бо намояндагони мақомоти пазирандаи грантҳо ба тасвиб расиданд.
Тавре аз сафорати Ҷопон дар ҶТ хабар доданд, дар чаҳорчӯбаи Барномаи Ҳукумати Ҷопон оид ба кӯмакҳои бебозгашт ва амнияти башарӣ барои бахши аъзами аҳолӣ (GGP) 2 лоиҳаи зайл маблағгузорӣ мешаванд:
«Лоиҳаи барқарорсозии бинои маркази саломатии ноҳияи Рушон» бо ҷ-би Худоёр Худоёров, раиси ноҳияи Рушон ба маблағи 86,103 доллари ИМА ба имзо расид.
«Лоиҳаи таъмири бинои асосӣ ва сохтмони бинои иловагӣ ба маркази саломатии ноҳияи Мурғоб» бо ҷ-би Мирзабай Ҷошбаев, раиси ноҳияи Мурғоб бо маблағи умумии 88,849 доллари ИМА тасвиб гардид.
Дар маросими ба тасвиб расонидани лоиҳаҳои мазкур, Такаши Камада суханронӣ намуда қайд кард, ки лоиҳаҳои Барномаи Ҳукумати Ҷопон оид ба кӯмакҳои бебозгашт ва амнияти башарӣ барои бахши аъзами аҳолӣ дар рушди устувори Ҷумҳурии Тоҷикистон саҳми назаррас хоҳанд гузошт. Лоиҳаҳои GGP дар саросари кишвар барои пешбурди кор дар самтҳои инфрасохтор, маориф, хизматрасонии тиббӣ ва ташкили ҷойҳои нави корӣ амалӣ мегарданд.
Дар вақти маросим, Сафир ҳамчунин қайд намуд, ки «ин лоиҳаҳо дар таҳкими ҳамкориҳои дуҷонибаи байни Ҷумҳурии Тоҷикистон ва Ҷопон нақши муҳим мебозанд ва ман аз намояндагони мақомоти пазирандаи грантҳо хоҳиш мекунам, ки барои баланд бардоштани сатҳи зиндагии ҷомеа тавассути лоиҳаҳои мазкур ӯҳдадории қавиро зоҳир намоянд”.
