Миёни ҳукумати Тоҷикистон ва ҶДММ «Ширкати байналмилалии Чжунгтсай Моҳир Семент» оид ба сохтмон ва ба истифода додани корхонаҳои истеҳсоли семент, гаҷкартон ва халта дар ноҳияи Ёвони вилояти Хатлон созишномаи сармоягузорӣ ба имзо расид.
Бино ба иттилои дафтари матбуоти Кумитаи давлатии сармоягузорӣ ва идораи амволи давлатии ҶТ, мувофиқи ҳуҷҷати мазкур, дар ноҳияи Ёвони корхонаи сементбарорӣ бо иқтидори истеҳсолии 1,2 млн. тонна дар як сол сохта мешавад.
Ғайр аз ин, бунёди корхонаи истеҳсоли гаҷкартон бо иқтидори истеҳсолии 1 млн. метри мураббаъ дар як сол ва коргоҳи истеҳсоли халтаҳои семент бо иқтидори истеҳсолии 80 млн. дона дар як сол низ дар назар аст ва барои бунёди ин корхонаҳо дар маҷмӯъ зиёда аз 145 млн. доллари ИМА сармоягузорӣ мешавад.
Гуфта мешавад, корхонаи мазкур бо истифода аз технологияҳои пешқадам ва риояи талаботи экологӣ бунёд гашта, барои 800 нафар мутахассисон ҷойҳои нави корӣ ташкил мекунад. Дар баробари ин, дар коргоҳи истеҳсоли масолеҳи сохтмонӣ ва варақаҳои гаҷӣ ташкили 230 ҷойҳои корӣ пешбинӣ шудаанд, ки сохтмони корхонаҳои болозикр дар 1,5-2 соли оянда ба фаъолият оғоз менамоянд.
Зимнан зикр мегардад, ки тибқи ин ҳуҷҷат, сармоягузор уҳдадор мебошад, ки ҷиҳати сохтмони объектҳои лоиҳавӣ ва таъмини фаъолияти корхонаҳо 90% мутахассисони маҳаллиро ҷалб карда, барои баланд бардоштани сатҳи тахассуси онҳо бо роҳи даъвати мутахассисони хориҷӣ ба истеҳсолот барои гузаронидани курсҳои таълимӣ, равона кардани кормандони маҳаллӣ ба семинару давраҳои омузишию таълимӣ ҳам дар қаламрави Тоҷикистон ва ҳам берун аз он чораҷӯӣ намояд.
