Зимни мулоқоти нахуствазири Афғонистон – раиси иҷроияи Ҳукумати ваҳдати милии Афғонистон доктор Абдуллоҳ Абдуллоҳ ва сафири Тоҷикистон дар Кобул Шарофиддин Имомов, ки санаи 6 октябр дар пойтахти Афғонистон доир гардид, масоили марбут ба эътидол овардани вазъ дар марзи давлатии ҳарду кишвар дар партави идомаи даргириҳо миёни нерӯҳои ҳукумати Афғонистон ва ҷангиёни ҳаракати Толибон дар вилояти Қундуз баррасӣ шуданд. Дар ин бора хадамоти матбуоти нахуствазири Афғонистон иттилоъ медиҳад.
Дар ҳамин ҳол, бино ба маълумоти Вазорати корҳои хориҷии Тоҷикистон аз 6 октябр, дар натиҷаи амалиёти ҷангӣ дар шаҳри Қундуз бинои консулгарии Тоҷикистон осеб дида, муваққатан фаъолияти худро қатъ кардааст.
Гуфта мешавад, дар ҷараёни мулоқоти доктор Абдуллоҳ Абдуллоҳ ва Шарофиддин Имомов атрофи масъалаҳои таъмини амният дар марз ва вазъи марбут ба гурезаҳои афғон гуфтушуниди судманд сурат гирифт.
