Ассотсиатсияи журналистони риштаи варзиши Тоҷикистон (АЖРВТ) 19 декабр даҳ варзишгари беҳтарини соли 2015-ро эълон кард.
Ба иттилои раиси АЖРВТ Нарзулло Латифов, гурзандози маъруфи тоҷик Дилшод Назаров варзишгари беҳтарини сол гардид.
“Дар мавсими варзишии соли 2015-ум дар байни варзишгарони тоҷик танҳо ба Дилшод Назаров муяссар шуд, ки дар мусобиқоти қаҳрамонии ҷаҳон оид ба навъи олимпии варзиш медал ба даст биёрад. Вай дар чемпионати ҷаҳон оид ба варзиши сабук дар шаҳри Пекин дар гурзандозӣ бо медали нуқра сарфароз гашт. Инчунин ӯ ягона варзишгари Тоҷикистон аст, ки имсол дар риштаи олимпӣ ба унвони қаҳрамони Осиё ва медали тилло даст ёфтааст (Ухан, Чин). Бояд гуфт, ки Дилшод Назаров то ба имрӯз танҳо варзишгари тоҷик аст, ки соҳиби роҳхат ба Бозиҳои XXXI тобистонаи олимпии соли 2016 дар Рио-де-Жанейро (Бразилия) шудааст. Дар мавсими имсола Дилшод Назаров, ҳамчунин, борҳо ғолиб ва ҷоизадори мусобиқоти байналмилалӣ аз силсилаи «IAAF Hammer Throw Challenge»” гардидааст”, – иброз дошт Нарзулло Латифов.
Ба рӯйхати 10 варзишгари беҳтарини сол, инчунин, инҳо дохил шуданд:
Комроншоҳи Устопириён (дзюдо)– ғолиби Гран-при дар вазни то 90 кг дар Қазоқистон, ҷойи 3-юм дар чемпионати Осиё дар Кувайт, ҷойи 2-юм дар Ҷоми кушодаи Осиё-2015 дар Тайван.
Саидҷалол Саидов (дзюдо) – ҷойи 3-юм дар чемпионати Осиё дар вазни 100 кг дар Кувайт, ҷойи 3-юм дар Ҷоми кушодаи Африқо дар Порт-Луи (Маврикий).
Муродҷон Тӯйчиев (гуштии юнониву румӣ) – ҷойи 3-юм дар чемпионати Осиё дар вазни 130 кг дар Доҳа (Қатар).
Фарҳод Анақулов (гуштии озод) – ҷойи 3-юм дар чемпионати Осиё дар вазни 125 кг дар Доҳа (Қатар).
Ҷаҳон Қурбонов (бокс) – ҷойи 3-юм дар чемпионати Осиё дар вазни 91 кг дар Тайланд.
Мавзуна Чориева (бокс) – ҷойи 3-юм дар чемпионати Осиё байни занон дар вазни 64 кг дар Уланчаб (Чин).
Шоира Зулқайнарова (бокс) – ҷойи 3-юм дар чемпионати Осиё байни занон дар вазни 64 кг дар Уланчаб (Чин).
Шарифов Хуршед (гуштии камарбандӣ) – ҷойи 1-ум дар вазни то 90 кг дар чемпионати ҷаҳон дар Қазон (Русия), қаҳрамони Осиё дар Эрон.
Акмалиддин Каримов (самбо) – ҷойи 2-юм дар вазни то 57 кг дар чемпионати ҷаҳон дар Марокаш, ҷойҳои 1-ум дар Ҷоми ҷаҳон дар Алмаато (Қазоқистон) ва Маскав (Русия), қаҳрамони Осиё дар Атирау (Қазоқистон).
Ба гуфтаи Нарзулло Латифов барои муайян кардани даҳ варзишгари беҳтарин сол дар назархоҳӣ беш аз 70 хабарнигори варзишӣ, ки дар нашрияҳо, телевизиону радио ва оҷонсиҳои иттилоотӣ кор мекунанд, ширкат доштанд.
